中秋節原本放3日假?中秋節冷知識你識唔識 文字

中秋節原本放3日假?中秋節冷知識你識唔識
刊登日期: 2017-10-04


一年容易又中秋!中秋節大家最着緊嘅除咗係玩月餅、食燈籠之外,當然唔少得嘅係有1日補假放吓、休息吓啦!但係唔講唔知,原來中秋節原本係唔止1日假架!而月餅本身,都唔係叫做月餅!原來中秋節都有好多不為人知的冷知識,過咗咁多年中秋,你又知唔知呢?

1. 中秋節原本有3日假放?
冇錯!早喺唐代朝廷就規定,中秋節可放3日假,直到南宋的時候,中秋節先得番1日假。所以依家大家得1日中秋節補假,要怪就怪南宋的皇帝啦!

2. 月餅本身叫胡餅?
月餅唔係叫月餅?咁叫咩?根據史料記載,漢代的時候,張騫出使西域,從國外帶回芝麻(胡麻)。當地人就用胡桃仁做餡,做出一種圓形的餅,叫作胡餅,這就是月餅的前身。

3. 月餅是由楊貴妃命名的?
咁點解之後又叫做月餅呢?原來係因為唐代的時候,某一年的中秋夜,唐玄宗和楊貴妃在打情罵俏,唐玄宗覺得胡餅呢個名唔好聽,楊貴妃就話,既然個餅同天上的月光一樣圓,不如就叫做月餅啦!從此,胡餅就改叫做月餅喇!不過,原來月餅在明代才正式成為中秋節的必備食物架!

4. 月餅要按親人人數切件,然後每人一份?
月餅咁高膽固醇、肥膩又咁油,通常都唔會自己食曬一個,同屋企人和朋友分甘同味先好食!但原來根據傳統習俗,月餅象徵圓月,所以必須按家人的人頭切件,每人一舊仔,啱啱好食曬一個月餅先為止圓滿、團圓。而未能出席聚會,或身在國外、未能回家的親人,大家都要計埋佢嗰份架!只係之後要將佢嗰舊仔月餅認真咁保存起來,等佢地返嚟食,咁先算圓滿。

5. 食芋頭可以辟邪?
點解中秋節要食芋頭?自清乾隆《潮州府志》記載:「中秋玩月,剝芋頭食之,謂之剝鬼皮」,原來係元代的時候,元兵攻入潮州城之後,當地百姓受盡凌辱,於是在八月十五嗰日,家家戶戶在拜月娘的供桌上放有蒸熟的芋頭,原因是芋頭是「餘頭」的諧音,人們為了攞個好意頭,便食芋頭,寓意剝鬼皮、辟邪消災。不過,就算唔信邪,食芋頭都有佢嘅好處:芋頭性平,幾乎人人都啱食,益胃健脾、補中益氣,能緩解食慾不振、渾身無力的問題,更能增強人體免疫力、保持肌膚彈性和延遲衰老。

6. 食月餅一定要配熱茶?
大家都知熱茶可以消滯解膩,所以食月餅一定要配熱茶,但其實熱茶除了可以幫助消化,仲可以止口渴和去除口腔異味。以後食完月餅,飲番杯熱茶,就唔洗驚個口會成陣鹹蛋和油膉味啦!

年年中秋節都係食月餅、玩螢光棒,好似dry dry哋咁,不如同屋企人分享吓中秋節的冷知識,大家一齊笑住咁過節啦!

文:Noelle So

更多打工仔分享,追蹤 ECjobsonline 專頁 或 瀏覽 www.ECjobsonline.com

標籤: 中秋節  中秋節冷知識  胡餅  月餅  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→