​【內外強勁】5大軟實力叫僱主對你另眼相看


今時今日無論係番工定番學,大家都着重學歷、經驗、攞過啲咩獎、識咩樂器、精通咩國語言等等,一句講曬,總之就係識嘅野一定要夠多、夠廣,仲要夠罕有!一個人的學識固然重要,但出到嚟社會工作,應該做的不是將知識背番出嚟,而係實踐出嚟,所以學術以外的所有範疇都係同樣緊要架!一齊嚟睇下你又有冇具備以下呢啲軟實力啦!

1. 創意能力
在這個樣樣野都追求創新的年代,多啲創意和想像力真係會有着數啲架!特別係IT科技、設計、創作等講究創意的行業,每年都要推出新產品,邊嚟得咁多新idea ? 呢啲idea咪就係出自員工想像力豐富的念頭囉!一個小小的想法,你覺得天馬行空,人地可能反而會欣賞、會buy你嘅idea!你的諗頭分分鐘仲可以改善社會現存的不足添!識行樓梯的輪椅、識自己消毒的扶手,咪就係咁樣誕生出嚟!所以話,一向有創意的你,在工作上就唔好收收埋埋喇!一於開行turbo!敢於向同事和上司表達你的意見啦!

2. Present能力
由小學開始我地就不斷被灌輸做簡報時應有的表達技巧,應該點樣先可以令匯報的流程清晰啲、觀眾會容易啲理解冇咁悶、在有限時間內點明所有重點等等,而呢啲技巧真係可以話一生受用!Present前做好一切準備工夫、諗一個吸引的開頭、講野清楚流暢、點出重點,就一定能夠幫助聽眾了解內容,大家亦會對你的簡報有一個深刻的印象。

3. 學習能力
好多人搵工時都會搵到一份與自己所唸的學系無關、未接觸過的行業,大家都會話冇經驗唔緊要,最緊要你肯學嘛!所以學習和適應能力在職場上可以話是十分重要!在短時間內了解工作流程,除左可以幫助自己適應公司的環境和文化,最重要的是,唔洗為其他同事和上司添加麻煩、要人幫你執手尾嘛!

4. 分析能力
由細到大,大人都會教我地要明辨是非,出到嚟社會做野都一樣。一大疊文件應該點消化好 ? 唔通真係要逐份逐行逐個字睇 ? 咁就睇你的分析能力有幾高、能否在短時間內搵出重點再將資料整理好喇!所以話一個人的工作效率,同你的分析能力是有直接關係的!想快啲做完啲野早啲收工 ? 睇你頭喇!

5. 合作能力
一個小組的組長或者上司最頭痛的,一定係屬下各有各性格、好難溝通、合作唔到。所以一個人的溝通能力高,去到邊、同咩人都夾得埋、合作得到,真係會為組長減少好多麻煩。而且大家分工合作,一定能夠在分秒必爭中,在一日內完成原本可能需時一星期的工作,咁就做咩都事半功倍啦!

眼見而家啲小朋友又要學呢野又要補嗰樣,我地都識話小朋友的處事、溝通、應變等能力是同樣重要,唔應該側重於學術方面的成就,呢番說法同樣適用於打工仔!番工唔係話讀過咩名校、番過邊間上市公司就一定做野叻啲,一個人的軟實力都不可以睇小架!

文:Noelle So

更多打工仔分享,追蹤 ECjobsonline 專頁 或 瀏覽 www.ECjobsonline.com

留言


請按此登錄後留言。未成為會員? 立即註冊
    快捷鍵:←
    快捷鍵:→