公司裁員或倒閉 人工應該點計? 文字

公司裁員或倒閉 人工應該點計?
刊登日期: 2017-09-11


打工仔日做夜做,每日每九晚六做足九個鐘,有時仲要犧牲埋食lunch嘅時間做野、放工開OT。其實個個做到咁辛苦,無非都係為左份糧,用以維持生計、養妻活兒、比家用、閒時消費娛樂下。所以,話打工仔係為左份人工而搏殺都不為過。咁touch wood講句,如果公司不幸倒閉、比人請食肥雞餐,或者公司要同人合併,迫於無奈要裁員炒左我,份糧應該點計先?而家我單方面被裁,我一向又咁努力工作,冇理由一啲賠償都拎唔到掛?

如果你連續受僱2年以上,因為公司結業或搬遷而被解僱;因公司裁員而被解僱;合約期滿前不獲續約;連續4星期內,停工日數超過正常工作總日數的一半 (例一星期工作5日,四星期即20日,但公司喻你停工11日),不獲支付工資的日數亦超過正常工作總日數的一半 (例4星期工作20日,但有11日冇出糧);或是連續26個星期內,不獲分配工作並不獲支付工資的日數超過正常工作總日數的1/3,你都可以得到遣散費作補償。

咁遣散費應該點計呢?無理由公司話比幾多就收幾多架嘛!員工都有權利知道自己應該得到幾多賠償,同埋有義務知道個賠償金額係點計出黎。遣散費的計算方法有二:

一是領月薪的員工,賠償金額就係按最後一個月的薪金的2/3再乘以年資,月薪以$22,500為上限。所以,無論係月入20萬的CEO,定係一個月得$30,000的高級文員,月薪都係以$22,500去計算。

二是收日薪或件薪的員工,遣散費就係喺30個正常工作日中,由僱員選任何18天的工資再乘以年資,僱員亦可選擇用員工最後12個月的平均工資去作計算。

月薪僱員 最後一個月的薪金 x ⅔ x 服務年資
日薪或件薪僱員於30個正常工作日中選任何18天的工資 x 服務年資 或
-------------------------------最後12個月的平均工資 x 服務年資

至於連續受僱5年以上的員工,若非因裁員或嚴重行為不檢而被解僱;因健康理由 (附有註冊醫生證明) 永久不能再從事現任工作而自動辭職;或是年滿65歲並自動辭職都可以攞長期服務金補償。服務金的上限和計算方法同上,但獲遣散費的員工,不能同時獲發長期服務金。

咁僱主要幾時向僱員支付遣散費同長期服務金呢?遣散費的話,根據《僱傭條例》,僱主必須在 收到僱員申索遣散費的書面通知後2個月內,向僱員支付遣散費。而長期服務金,僱主則必須在僱 傭合約終止後的7日內向僱員分發。

另外,有人會問公積金、退休計劃利益或按年資所支付的酬金會否與遣散費或長期服務金有所抵觸,答案係會嘅。任何有權獲發遣散費或長期服務金的員工,如已獲支付一筆按服務年資去計算的酬金、職業退休計劃利益,或在強制性公積金計劃中,已獲支付一筆累算權益,就會同上述的遣散費或長期服務金的款項抵銷,金額上限的條款卻與兩者相同 。

睇到呢度,希望大家都有袋到野落袋,咁萬一大家日後真係咁唔好彩,遭遇以上情況,都可以知道自己的賠償金有幾多、金額如何計算等等,到時就唔會騰曬雞啦!

文:Noelle

更多打工仔分享,追蹤 ECjobsonline 專頁 或 瀏覽 www.ECjobsonline.com

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→