【問呢啲】過年最怕長輩發問的8條問題 文字


眨下眼又到新年,唔知大家最期待咩新年節目呢?行年宵?食年糕 ? 逗利是 ? 定放新年假日日訓到黃朝百晏?不過,睇嚟大家都係冇咩時間去玩架喇!一到新年就零舍多飯局,由年三十晚食到年初十都好似未食完餐飯咁,同成班親戚一齊食飯,仲要好似過關咁被人問一大堆問題,真係唔做定心理準備都唔得!祝各位巴絲打好運喇!

1. 返緊邊間公司
雖然話就話一年見一次,但大部份親戚見到自己都會好似第一次碰面咁,一劈頭就問你做盛行、返緊邊間大firm,無非都係想chok你間公司係唔係出名大集團、你一個月搵幾多、做得夠唔夠太粒,繼而炫耀自己仔女有幾巴閉,名副其實嘅踩人地個仔,捧自己個女。

2. 做野忙唔忙/有咩做
究竟啲親戚係咪冇野好問先可以問到啲咁無聊嘅問題?邊有人返工唔忙、唔多野做 ?而且返office嚟嚟去去都係做嗰啲野,你想我答啲咩?起火箭定種菜?不過,對方咁問得都係想曬自己個仔做總經理,返工好梳乎姐!

3. 賺緊幾多錢
唔少人過年出去食飯,都會被問到一個月賺幾多錢等有關薪金的問題,夠唔夠洗?夠唔夠比屋租?夠唔夠食?其實如果我話唔夠,你又係咪會比錢我用先?我係賺得唔多啊!不過我有嘅係志氣!哼!

4. 加左幾多人工
雖然話就話講錢傷感情,但同成班親戚一齊食飯,大家都總係鐘意講錢!加人工有邊個唔想?但家下搵食艱難,唔比人炒已經算偷笑,仲話加人工,一個月搵到三、四萬已經算唔錯架喇!

5. 年終獎金/花紅分到幾多
其實年終獎金有幾多、花紅可以分到幾多,唔係我呢個small potato可以話事,不如我比我老細電話你,你自己問佢啊?

6. 幾時升職
出得嚟行就一定係講銜頭,同成班親戚一起食飯更是如此,八姨婆個女做manager好威,點知三姑媽個仔升左做CEO仲勁!其實升到咁高級又係咪真係咁好呢?係就係人工高啲,但責任又大啲、工作的複雜程度又高啲、壓力又大啲,我就唔係咁稀罕喇!

7. 幾時買樓
查實班親戚係咪長期隱世、不知人間疾苦?香港啲樓價咁貴,餐餐要捱麵包、唔去旅行、唔睇戲、唔唱K先至比到個首期,我出得嚟玩就預左我買唔起架啦!你講得咁輕鬆,不如你幫我供啦?

8. 幾時拍拖/結婚/生仔/生多個
呢四個問題,唔洗問,應該係人都遇過,更會隨住人生階段的轉變不斷轉換,單身嘅就問你幾時交男/女朋友,拍緊拖嘅就問你幾時拉埋天窗,分左手就重返問題一,甚至提出要幫你介紹對象,當你好唔容易有左個穩定嘅對象,就回到問題二,結左婚唔夠一日就問你幾時生小朋友,生完一個坐緊月就問定你幾時生下一個,然後無限延伸,小朋友幾時入幼稚園、小學、中學,再嚟個下一代嘅無限loop。咁多位姨媽姑姐表叔表嬸,其實有咩消息自然會通知你地,唔洗急埋我嗰份,多謝關心。

新年流流一家人一齊食飯好好地,無謂搞到大家面阻阻又尷尬啊!與其問人地月薪幾多、職位高唔高,不如關心下對方工作順唔順利、做得開唔開心啦!氣氛即刻變得更有愛啊!

文:Noelle So

更多打工仔分享,追蹤 ECjobsonline 專頁 或 瀏覽 www.ECjobsonline.com

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→