打工仔6種最常見職業病


打工仔日日朝九晚六,喺個位度坐足八個鐘,食無定時,平時又少運動,唔多唔少都會有啲腰酸背痛、胃痛、心煩氣燥嘅症狀。以為習慣左就唔會有事 ? 咁你就錯喇!長期積累落去有機會形成職業病 ! 到時真係可大可小架!一齊睇下上班族最易得嘅係咩職業病,你又有冇中到啦!

1. 胃病
打工仔成日食無定時,出去食飯又食得唔健康,好容易會打亂胃部本身的生理節奏和作息,造成胃痛、胃氣多、胃脹,甚至急性腸胃炎等毛病!當然,預防的方法非常簡單,就係飲食要定時,三餐份量要平均,盡量食清啲、健康啲,自然就冇咁容易胃痛啦!當然,有啲人會胃痛可能係因為工作緊張,不過都要記住唔好過份依賴胃藥啊!

2. 腳痛
成日坐喺度唔郁、維持同一個姿勢,會減慢血液循環,造成深靜脈血栓,導致腿部出現腫脹、疼痛、發熱、紅腫等症狀,嚴重更會引致呼吸疼痛、急性肺栓塞等問題!要預防呢類被喻為「經濟艙症候群」的症狀,最簡單都係郁動多啲,多走動、多飲水,血液循環暢順,就冇容易出現靜脈曲張嘅情況啦!

3. 滑鼠手/鍵盤手
打工仔成日都要對住部電腦,對手係咁打字、click mouse冇停過。手部肌肉長期處於呢種疲勞狀態,會引致手指麻痺、抽筋、無力,手腕、手肘和肩關節亦會出現病理變化和臨床症候群。要預防滑鼠手和鍵盤手,應注意坐姿、手腕的位置以及使用滑鼠和鍵盤的正確手勢。建議大家可以加一個托腕或滑鼠墊承托手腕 ; 每隔一段時間做下握拳、fing手的動作,以放鬆手部肌肉。每晚用熱水泡手亦可幫助鬆弛韌帶和肌肉、減輕水腫和疼痛症狀。

4. 視力模糊、臉部僵硬
上班族成日對住個mon,搞到對眼又乾,睇野又朦。對得多個電腦螢幕,仲有機會出現面部肌肉僵硬、臉色發白、皮膚乾燥等症狀!絕對唔可以睇小電腦的傷害力!所以,身體最好都係同個mon 保持至少70cm的距離 ; 每用電腦一個鐘就要休息10分鐘 ; 並多吃蔬果補充維生素 ; 另外,唔想啲皮膚乾爭爭,睇完電腦記住要做番保濕,同埋唔好化咁濃妝喇!

5. 腰酸背痛
經常坐着唔郁本身已經唔好,如果加上坐姿唔正確、座椅不合人體工學,定會造成腰酸背痛、脊椎受損的情況。因此,要改善腰酸背痛的問題,應該經常轉換坐姿、拎下頭、踼下腳、拉下筋,多啲活動先能夠徹底預防。

6. 焦躁症
職業病唔一定剩係指生理症狀,心理唔健康都可以係職業病的一種。打工仔成日處於精神緊張的狀態,又要討好上司、客人,又要應付同事和繁重的文件,真係EQ低啲都handle唔到。所以,好多上班族都有心浮氣燥的症狀,容易在工作過程中產生焦慮和無故的擔心。要改善這個問題,首先就係要放慢生活和工作的節奏,多停下來整理自己的思緒,plan好每日的工作進度,先會做得輕鬆又有效率。

職業病雖然唔出奇,個個打工仔差唔多都會中一至兩個症狀,但平常歸平常,唔理佢只會越積越嚴重。所以,想番工番到輕鬆自在又開心,都係着手改善問題好啲 ! 由今日開始,正視自己的職業病啦!

文:Noelle

更多打工仔分享,追蹤 ECjobsonline 專頁 或 瀏覽 www.ECjobsonline.com
《繼續吹》某日某月 - 湯怡同大地雞同鴨講!?

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→