大家仲記得元綠壽司嗎? 精選

唔知各位讀者仲記唔記得元綠壽司呢間老牌既日式食肆呢?元綠始創於1990年代初，據說係由當時既栢寧頓集團引入香港(初初叫元祿壽司，到90年代中期改叫元綠)，元綠壽司可以話係影響左當時香港既飲食文化，首先佢係第一間係香港利用迴轉壽司作為招徠既餐廳，第二，元綠仲同TVB合作，係綜藝節目「超級無敵獎門人」入邊開創一個名為「辣辣壽司邊個食」既遊戲環節，令到當時未盛行既日本菜逐漸成為潮流。全盛時期既元綠壽司係全港有41間分店，即使到左凌晨時份黎幫襯既人依然係絡繹不絕。當時元綠仲搵左武打巨星成龍同人氣組合Twins做代言人，而且係好多港產片入邊都會見到元綠既Product placement，例如成龍主演既《新警察故事》入邊便多次見到元綠個logo出現。
人氣組合Twins曾經係元綠壽司既代言人

但好景不常，受到98年金融風暴沖擊既元綠壽司元氣大傷，環球飲食集團（亦即英皇）接手之後亦未見起色，元綠不單要面對老對手元氣壽司既挑戰，踏入千禧年後壽司店係香港就如雨後春荀般湧現，例如板長、板前、爭鮮和一壽司等等，令到元綠面對更大既競爭，分店執下又一間執下又一間，到左近年有唔少網民批評元綠壽司既難食程度拍得住明將，仲話呢間老牌食肆已經步入黃昏。果然，最後一間位於天水圍既元綠壽司係2016年2月底執埋粒，執粒前一個月仲推出左$48蚊壽司放題既優惠，事後不少網民笑指元綠壽司執粒前推出任食既優惠既目的係為左清埋d倉底貨。一代經典食肆就咁黯然消失無不令人感到嘆息， 但「過去就讓它過去，曾經畢竟只是曾經」，筆者深信元綠壽司會永遠存在係大家既心中~~