[澳洲.布里斯班] 澳洲新婚之旅(Day 3)

迷你黑洞 於 23/07/2014 發表 收藏文章
來到布里斯班的第三日,一早就起程去邊?梗係去探下澳洲國寶,目的地係龍柏動物園Lone Pine Koala Sanctuary。

因為未見過真既樹熊同袋鼠,而且只得昆士蘭省仲可以親手抱樹熊影相,加上呢個公園既樹熊算係數一數二多,所以都要去會一會佢。如果晌Queen St既Information Center買入場票會平過去到門口買$3,成人$30,如果有YHA咭好似再可平$8。
買完飛就可以直接去巴士站,巴士站晌附近一個叫Myer既商場下面,晌Queen St上面有樓梯可以落到地下巴士站。巴士#430,全程45分鐘,晌Platform B4開出,巴士一個鐘一班,如果平日每小時45分就會有一班,詳細時間表可以晌Translink既Journey Planner度搵下。

個公園其實唔大,我地用左大概兩個鐘頭就行完,而表演就睇左Koala presentation同Sheepdog趕羊同剪毛。



園內唔會只得Koala同Sheepdog兩種動物,都有其他飛擒同動物俾人熱下身先。
行到咁上下,都係時候見下主角之一既Koala。
 
佢地一日訓到黑,所以一路訓一路轉姿勢,呢兩隻係用比較正常既方式訓覺。
  
呢隻就係咁變身,一時覺得佢玩緊瑜伽,一時又好似Transformer咁屈呀屈屈埋自己,爭在未將d手手腳腳放入口。

呢隻個背影有d似...大吉利士! 佢只係訓得太頹。

Koala presentation聽佢講野其實有少少悶,視乎你有無興趣知道關於樹熊既事,而重點係講完之後,講解員會抱住隻樹熊出黎,你可以摸佢同同佢合照。其實隔離有地方係俾你抱住樹熊,再單獨影相 (見兩個人一齊影都得),但一張相要$16都幾貴,所以最終都係摸下佢再企係隔離合照就算。
跟住去睇下澳洲另一國寶,未到之前又有不知名既雀仔間下場。


呢度既國寶袋鼠係响個固定園區放養,遊客可以進入去餵佢同摸下佢。晌General Office果度有$2一包既袋鼠零食,買左就可以去袋鼠公園餵。果度大概有廿隻袋鼠,可以摸又可以同佢地影相,都幾好玩,只係佢地無想象中咁活躍,唔會跳下跳下,通常都係頹攤,任你魚肉。

有人餵完佢,以為佢會乖乖就範,就準備開片。

點知隻袋鼠一凶番佢,某人就自動收皮,重要攞番袋零食出泥擺和頭酒,真羞家。


Sheep Dog表演都幾有趣既,可以睇下人地點樣令訓練好既Sheep Dog可以趕羊咁犀利。
行下行下發現仲有剃羊毛表演,時間就到就睇埋先走。



隻綿羊俾人左舞右舞,一陣就唔見晒d毛。最後可以摸下剃左毛既羊同摸下羊毛,另外重見到有遊客拎走羊毛當記念。我好唔鍾意呢個剪毛活動,你睇下隻羊個樣幾咁可憐,眼泛淚光。。
出番市區已經有d肚餓,係時候搵野醫肚,係落車附近左行右行,見到Myer Centre地面既Nando's燒雞好似唔錯,唔好諗就埋去試下。  
呢度有三隻唔同既sauce,重要有Hot同Extra Hot!正!!一於試晒佢地。

我地只係要左半隻雞,因當時已經三四點,要留肚食晚餐。Nando's既燒雞唔錯,冇咩雪藏味又唔會太嚡,d汁又惹味兼Extra hot夠辣,最後食埋個salad,十分滿足。

 

食飽就要落格,襯未日落就在市區遊走,走到New Farm Park都見到尋日開得燦爛既樹花,自己對樹既認知係有限公司,所以攪唔清係咩樹,反正開得靚,影多幾張相先講。

New Farm Park都係Brisbane River旁邊既公園,係碼頭影相時,發現沿住Brisbane River有唔少碼頭,而其中一種穿梭於Brisbane River市內碼頭既叫CityCat,有落船點的North Quay在番酒店既步行範圍內,就決定坐船番酒店附近既超市買野番去煮。


回程遊船河真係十分好既選擇,既唔使行去搭車,船又行得十分隱定,兼有市內夜景睇,真係一舉三得,唯一唔好係影相既難度提高左唔少,因為隻船再定都會兩邊搖。

見到高樓大廈,就知就快到市中心既North Quay碼頭。

遊完船河時間比較夜,呢個時候既Brisbane都冇咩餐廳選擇,最多既係pub,所以去左最大既連鎖超市Coles同Woolworth睇下有咩可以煮,反正我地既apartment hotel有齊煮食架生。感覺上Woolworth好似比Coles平,但Coles間中會有特價$1、2貨品,要用係香港訓練開既精明眼格下價。

最後分別買左豆角、牛肉腸、西冷牛扒返去煮。


加埋雪糕同尋晚既木瓜,最後飽到唔識郁。牛肉腸同fillet牛扒都好,新鮮又肉味濃,但最好係豆角,外表脆綠,食落清甜無渣有驚喜,真係估佢唔到囉。

Lone Pine Koala Sanctuary
http://www.koala.net/


Nando's
Address : 91 Queen Street Shop 64 Brisbane QLD 4000 Aus

CityCat
http://www.brisbane.qld.gov.au/traffic-transport/public-transport/citycat-ferry-services/citycat-ferry-terminal-locations

Coles Brisbane
http://www.coles.com.au/store-locator/search?lon=153.02359&lat=-27.4661&kms=10

Woolworths
http://www.woolworths.com.au/wps/wcm/connect/website/tools/store+locator


更多最新的飲食資訊在我的Facebook page,請給我一個’LIKE'吧!

留言


請按此登錄後留言。未成為會員? 立即註冊
    快捷鍵:←
    快捷鍵:→