元朗-環境舒適的友緣西餐 文字

DINENFOOD於 04/02/2017 發表 收藏文章
今日去左間少少浪漫,少少格調,但係餐廳名字有啲啲老餅既西餐廳「Forever 友緣西餐」,裝潢以西式為主,環景簡單舒適,座位很寬敞,唔會覺得有侷促嘅感覺。


一坐低就有侍應奉上兩杯橙汁,話係welcome drink,幾有新鮮嘅感覺,不過飲落就橙味唔多夠,有少少淡。


睇咗陣menu,最後點選:2個set dinner,「波爾多紅酒焗羊膝配意式燴雜菜伴薯蓉$238」、「紅花忌廉汁伴海鮮手作麵$158」。最特別係因為餐廳慶祝一周年紀念,每叫一個套餐就有一個升級優惠,仲要日日都有唔同,今日星期一,就可以+$1叫個「海鮮酥盒」,同埋可以用優惠價$25叫個甜品。感覺上餐廳有好多唔同嘅優惠。


「餐湯+蒜蓉包」是日餐湯係「煙肉柳菜花忌廉湯」,味道唔錯好香濃。如果想試吓其他口味,可以額外+$40,點選「法國干邑龍蝦湯」,不過味道就有點濃,不過就好香龍蝦味。蒜蓉包有2片,焗得好香口,牛油同蒜蓉好香,沾上湯味道不錯。


「海鮮酥盒$1」係用升級優惠+$1就可以點選,賣相好精緻,酥皮焗得好香脆,配上一隻蝦,配料有蜆肉蟹柳蘑菇等白汁撈成。食落口感好豐富,味道唔會太鹹,作為餐前小食算唔錯。


「波爾多紅酒焗羊膝配意式燴雜菜伴薯蓉$238」一隻好大隻嘅羊膝出場啦,整件羊膝以企身出菜,好有震撼性。羊膝以波爾多紅酒炆至軟身,食落完全唔會覺得靭,醬汁炆至入味,配上薯蓉伴食,口感不錯。


「紅花忌廉汁伴海鮮手作麵$158」賣相好靚,材料好豐富,我嘅注意已經放咗喺海鮮身上(大蝦、帶子、青口)啦。而手作麵就係闊蛋麵,食落好似闊條麵咁,但口感食落比較煙靭,伴上忌廉汁食落好creamy。


「藍莓芝士蛋糕$25」用上一隻好大嘅碟,以士多啤梨醬及芒果醬,畫上花形圖案襯托,亦都有草莓及藍莓伴碟,賣相好靚。藍莓芝士蛋糕的味道唔錯,唔會過份甜,而藍莓醬酸甜咁,口感都唔錯。


「焦糖燉蛋$25」用上一隻好大嘅碟,以士多啤梨醬及芒果醬,畫上花形圖案襯托,亦都有草莓及藍莓伴碟,賣相好靚。焦糖燉蛋表面上嘅糖漿燒至凝固,糖餅食落甜甜地仲可以咬碎,燉蛋就比較結身,但食落都可以接受。


「餐飲」附送熱飲,但凍飲就要+$3。叫左「凍奶茶」、「凍檸茶」,玻璃杯嘅形狀幾特別,好似帆船酒店咁彎彎地。餐飲嘅糖漿係自己落嘅,咁樣就可以因應自己嘅喜好添加多少,啱晒注重健康嘅人仕。

p.s. 最後,最值得欣賞嘅係,餐廳嘅職員服務好好,會因應你食嘢嘅速度,再安排好嘢食嘅上餐時間及次序,咁樣就唔會搞到成枱都係嘢食。

「餐牌」我已經影左上載至openrice既「餐牌」入面啦,方便大家查閱相關菜式。

Forever 友緣西餐
網址: https://s.openrice.com/QrbS0gZi700
地址: 元朗 西菁街23號富達廣場B座地舖
電話: 2443 1228
收加一服務費

----------------------------------------------------------------------
Dinenfood
生活就是享受. 到處吃喝玩樂. 分享各類資訊
Facebook: https://www.facebook.com/dinenfood/
Instagram: https://www.instagram.com/dinenfood/
Email: dinenfood@gmail.com
Whatsapp: +852 6718 6106

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→