偽影評 - Wonder Woman 《神奇女俠》 文字

偽品味 真鳩噏於 05/06/2017 發表 收藏文章
Photo credit: imdb.com

對於Wonder Woman(WW),用「萬眾期待」四隻字形容就最適合,尤其係各方好評如潮,我相信DC已經好耐無試過有咁positive嘅feedback。

還記得套Batman vs Superman (BvS),筆者一提起就嬲到爆,成套嘢搞咗兩粒鐘然後唔知做乜提完老母個名就完咗。真係你老母。WW成為BvS依套垃圾嘅唯一亮點,當時無論造型、選角同人物性格設定都令人眼前一亮。

無辦法唔期待WW上畫。

而好明顯全人類都同筆者一樣,電影公司/戲院亦都非常明白。
於是乎,首周上畫,所有discount一律收皮。我頂...係要咁樣搶大家錢。念在Gal Gadot,alright...alright...

故事講述主角亞馬遜公主Diana本來一直响隱世天堂島生活,直至有一日英國間諜飛行員Steve墜機誤入天堂島,Diana從Steve口中發現天堂島以外嘅世界正經歷戰爭。因住其亞馬遜人熱愛和平嘅性格同埋使命感,Diana認為由佢去殺左戰爭之神Ares就會令人類世界再次回復和平,於是就跟Steve去到第一次世界大戰中嘅倫敦一齊戰鬥。後來終於發現自己嘅能力,認清使命,成為WW。

筆者絕對唔係一個漫畫迷,對於同類片嘅興趣真係僅限於Marvels系列(仲要係某幾個,連Iron Man都無睇過)。
上一次睇BvS都係因為朋友話要睇(that's why中伏...)。
今次睇WW覺得都幾正,睇完之後不停上網睇返依個角色嘅事蹟。

成套戲最值得睇嘅,梗係Gal Gadot。
自佢响Fast and Furious做Gisele開始已經有留意依個由以色列嚟嘅女演員。
有邊一個睇佢响Fast Five入面甩開條布,著住bikini去拎條咸濕佬手指模嗰一刻唔係「哇!」一聲?
仲有佢飛車試圏速完全唔輸俾男人嗰個氣場...型到震。
搵佢嚟做WW唔知點解就係好夾,係連個氣場都好夾。

WW入面嘅Diana本身一直住天堂島,對人類世界嘅嘢只係從書本入面睇過。
所以响佢啱啱開始「入世」嘅時候,笑料就不停出現,即係鳩吓鳩吓咁。
但係由Gal Gadot做就係超可愛﹗完全無違和感。
例如Diana食人生嘅第一杯雪糕嗰陣個滿足樣同埋叫人"You should be very proud!"、一副正經樣拿撚住把劍衝出去自轉閘、仲有佢試衫响度踢腿...
How can you not fall in love with her?

响小鳩鳩嘅同時,佢又响唔同時候展現其wisdom同courage。佢因為遲咗一步令將軍成功發放毒氣,非常內疚傷心;之後又憑住一股熱血衝去無人區救人,嗰個determined嘅樣,邊個會唔動容?
對於一個Super Hero嚟講,佢將Diana依個角色表現得非常立體。

WW作為近年少數甚至第一套以女姓Super Hero作題材嘅電影,筆者特別鐘意佢哋對男、女角色嘅處理。
我相信本來响漫畫時期已經好emphasize,WW雖然係女人,但係因為天堂島本來只係得女人,對Diana嚟講,男同女都一樣。
男女無分社會角色、無分高低,甚至WW作者都表示,Diana當然有同過女人一齊,難道只有女人嘅世界就會無愛?
不過依一個point亦都要處理得好小心,好似筆者有睇一段評論,話Diana之前鍾意女人,係因為無見過男人。
我相信絕對係扭曲咗作者原有嘅意思。Diana對任何人都唔會以男、女之分,同樣只係人類,對任何人都可以有愛慕之情。
所以筆者認為話Diana係Bisexual都唔係太正確...不過依度就唔多加討論嘞。

而飾演「男主角」Steve嘅Chris Pine其實亦令套戲生色不少。
响一套以女姓做主導嘅戲入面,Chris Pine恰如其分咁做好襯托嘅角色,同Gal Gadot亦好有Chemistry。
Chris Pine帶有少少戇直嘅感覺(特別係响船上面同Gal Gadot講男女瞓覺嗰段),夾埋Gal Gadot好正。
最重要嘅係,角色設定Steve並唔同戲入面其他男人一副睇低女性,反而欣賞同尊重Diana,令WW角色更為突出。

相信依套堪稱DC電影史上最受歡迎嘅英雄電影,應該記一功嘅當然仲有導演Patty Jenkins。
依位曾經拒絕執導Thor嘅導演,對WW嘅熱愛同故事表達信息嘅堅持,令作品普遍得到極好評價。
其實「以愛去停止戰爭」依啲咁老土嘅message,要拍得好睇真係唔易㗎...

Gal Gadot目前只係同DC簽咗3張片約,希望DC見到今次回響咁正面,WW series可以一直做落去,唔好換人呀﹗

(後註:今日睇到話Patty Jenkins & Gal Gadot已落實拍WW2!係咪堅?!係就正啦!!)

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→