力爭上游．不斷追求 精選

香港地，資本主義發揮到極致嘅一個地方，我哋每一個人，由細細個開始已經被貫輸左一套「力爭上游，不斷追求」嘅價值觀，資本主義嘅洪流，由我哋嘅父母牽起，再由老師、同學、朋友、親戚、上司、同事以至傳媒等推波助瀾。可惜嘅係，佢哋並唔係教曉我哋追求快樂，而係鼓吹我哋追求物質。
我哋從小開始耳濡目染，跟住互相洗腦，交叉感染，呢個追求金錢同物質嘅想法，經歷惡性循環，最終發展成為雄霸社會主流嘅終極價值觀。就係咁，我哋認為追求更豐盛嘅物質享受，先至係快樂，先至係人生，先至係唯一出路。

如果唔行呢一條主流嘅路線，只會不能幸免地承受主流嘅批判，被標籤為異類，被冠上失敗者嘅名稱。「攪藝術？你想乞食呀？」「攪社運？你咪喺度攪屎棍啦！」「理想？可以當飯食呀？」

然而，踏上主流之路，基本上要滿足你無限嘅慾望，除非你擁有如Steve Jobs或Mark Zuckerberg嘅超凡頭腦，可以化腐朽為神奇，食腦揾大錢，又或者你係成功須父幹嘅富二代， 否則你必須非常之咁努力工作搏命揾銀，先可去填補呢個「欲望之氹」。留意，係填補，唔係填滿，因為呢個欲望之氹係無底深潭，係無盡黑洞，當呢個氹一啟動，你永遠只會想追求更多，基本上同隊鴉片無異。
如著衫，起初只講求舒適、講求得體，慢慢又會想著貴D ，以身上嘅錦衣華服宣示自己嘅社會地位。

如食嘢，吃得飽不夠，味道好不夠，環境正不夠，仲要吃得豪、吃得講究、吃得有氣派。

如住屋，新界四百尺上車盤不錯，市區八百尺單位更好，但最好梗係可以有間過千尺坐落靚地段嘅豪宅，做個上等人，跟住再買多幾個單位收租。

又如搭車，縱然公共交通非常方便，不過始終自己有架車方便好多，日本車性價比高，但亦不及歐洲車嘅格調高。

衣食住行，我哋無不要求更多更多，所有東西，無論起初是係甚麼功能，最後都係殊途同歸，我哋擁有嘅比需要嘅更多，所有嘢都變成我哋身份嘅象徵。
對好多人嚟講，努力向上爬，並非追求工作上嘅滿足感，而係單純為左揾更多，填滿自己嘅欲望之氹。喺填氹過程之中，我哋全力以赴，疲憊不堪，身心俱疲後又須要更多嘅物質享受去慰藉自己。一天，或許我哋會猛然發覺，點解個氹填極都填唔完嘅？同時，我哋亦會發現，除左用金錢去填氹，我哋仲擺低唔少血汗、青春、健康、同屋企人朋友相處嘅時間，甚至乎係自己嘅夢想。

拼命向上爬，或許會感到疲累。爬到某個位置，或許會感到高處不勝寒。但係，回頭太難，慾望之氹告訴我哋，冇理由要原地踏步，更加冇可能過倒退嘅生活，一個月洗開十萬，有咩理由要番轉頭洗番五萬，即使咁樣可以換嚟更寶貴嘅時間同健康，但我們依然難以抗拒慾望之氹嘅呼喚，耳邊傳來一把聲音：「唔好咁戇居諗咁多，有時間諗下點樣搵夠廿萬好過啦！」
或許，面對住呢股難以抵抗嘅洪流，縱然我哋偶有反思，卻冇足夠嘅勇氣停下腳步，最終亦只能不由自住地繼續往上爬。

正所謂上山容易落山難，填氹之路亦只有繼續行，資本主義萬歲！

Into The Darkness 入黑圖文
更多精彩內容: www.facebook.com/intothedarknesshk