尖沙咀一向都係日本菜既重駐地，Omakasei而家更係開左去好多地方，廚師發辦既好處就係坐定定唔駛諗，廚師就將最當造最新鮮既奉上，仲專人服侍你跟住用餐進度上菜。
而呢間開左唔係太長時間既店舖，位於亞士厘道既樓上舖頭，拉開少少既布簾就會見到日式既設計，有普通卡座位，要食Omasaki緊要坐吧台位。
店內設計較簡潔，位處十幾樓應該想景觀好啲就俾大家睇到外面樓層風景，入面都係白色木系設計，有好多小小既日系飾物。
師傅先擺好盤之後準備放刺身壽司，全部都係即切，食過少少都真係好鮮味。今晚選擇左《松》套餐($1580)，先黎左個擺盤好靚既前茶，包括左《蜆》伴上醬汁細隻但清甜，《菜心》看似平平無奇但上面既蛋黃醬蛋香重，《芝麻牛蒡 》上面淋滿芝麻醬好香好濃。
下一味開始師傅就開始展示刀工，即時拎出黎即時切，先黎左一個《左口魚薄切》，入面包左4塊左口魚薄切同埋1片裙邊，配上左個特製既酸汁，食落夠爽口彈牙，點上酸味味好開胃。
下一味係《鰤魚》，屬於冬天當食既魚種，可以話係油甘魚之王，見到粉色肉質已經好吸引，所以一入口真係好肥美，同埋油脂真係大爆發。
呢個真係大推，燒到金黃色外皮《金目鯛》，燒完之後個外皮真係超香脆，燒香後魚油係會入口之後滲出黎，好香好肥美。
至於特別既一定係《螢光魷魚》，用上左有別於外面做法，全部都係新鮮無醃製過，所以一咬頭部個位就會有膏湧出黎。
另一道小菜就係《北海道毛蟹》，附上左一碟蟹醋，小碟內有齊蟹腳蟹肉同蟹膏，毛蟹蟹肉札實，而且十分鮮甜，唔駛點醋都已經好夠味。
然後就到左《拖羅》，師傅話因為係無急凍，新鮮即送即整，所以有機會會咬到有少少根位，食落油脂都算豐厚。
食完一輪刺身之後就到《鹿兒島和牛》，鹿兒島和牛出名油脂未必有咁多，但係肉味真係好重，依然香腍，同埋有配上左柚子鹽，麵豉醬或蒜片一齊食，果塊蒜片真係極香極脆。
之後就到壽司，望住師傅將舊飯揵黎揵去好熟手，先上既係《春子鯛》，屬於小型的鯛科魚類，無須要起皮就可食用，肉身較為幼嫩。
下一味係《車海老》，上面已經掃上左醬油，海老入口彈牙，而且甜味較重，食落真係好鮮甜而且大大條好滋味。
呢輪既最後一味係《烏貝》，烏黑色既顏色，而且真係好生猛仲識郁，入口好似生蠔既味道，好豐富既海水味，不過無生蠔咁Creamy而較為爽口。
跟住就到揚物係《天婦羅》，入面包左個鱈魚，個炸皮真係好薄身同好貼個餡好出色，魚質好鮮滑而魚香味出，另外仲有南瓜同蕃薯。
又去番壽司既次序，今次係《針魚》，中間切開賣相一流，中間再加上薑和細蔥提味，入口較為爽口而加上少少蔥香更清新。
唔少得《北海道馬糞海膽》，個小砵外型已經贏左真係好靚，入面既海膽係我地望住師傅放上左一層又一層，雖然小小碗但真係滿滿既海膽，而且十分甜同無苦味入口即溶，而飯底放上左少少既wasabi更加惹味。
好多人麻麻地但我好鍾意食既《醋鯖魚》，其實係一個幾難整既壽司，要去左腥味而又唔可以過酸，醋浸泡之後，再係上面放上一塊蘿蔔片取代平時用既昆布更有口感，有魚鮮亦有淡淡既醋味。
一碟另上既《吞拿魚骹》，見到已經見到燒到勁香勁吸引，骹位油份足仲要用上火槍燒過更加將油份完全咁迫哂出黎。
最後送上《吞拿魚手卷》，入面包住左吞拿魚蓉，醃蘿蔔絲同蔥花，紫菜最緊要夠香脆，入面再灑上醬汁更好食。
食完之後送上《白魚清湯》，食完一系列既壽司之後飲清湯可以去走油膩味，而清湯真係好清甜，入面既白魚魚鮮味足而又夠滑溜。
最後水果就係《蜜瓜》，仲要係網紋既，凍冰冰既蜜瓜好甜好香，食完咁多野之後食番個高質水果真係超滿足。
店名：鮨瀧
地址：尖沙咀亞士厘道17-19號17樓
即刻入去Like & Share埋我地既其他頻道:
Facebook: KJFOODLIFE飲食玩樂地圖
Instagram: KJFOODLIFE
Website: KJFOODLIFE飲食玩樂地圖
Openrice: KJFOODLIFE
Ublog: KJFOODLIFE飲食玩樂地圖
歡迎報料同合作:
Email: kjfoodlife@gmail.com
Mobile: 63525193
餐牌:
請按此登錄後留言。未成為會員? 立即註冊