【包飲包食】尖沙咀和幸吧~貼心又好食的日式燒烤

莎包Mind Too Wild 於 06/04/2014 發表 收藏文章
先嗰排為咗同Babe P小姐慶祝生日,就上Open Rice搵邊度有好嘢食。由於我同P小姐都係住新界偏遠地區,所以揀咗位於尖沙咀嘅〖和幸吧〗日式燒烤,方便大家食完散水返屋企。


其實依次飯局都約得比較急,照博一鋪Book禮拜五晚8點,幸好都店員話室外仲有位。當日店員除左會打嚟confirm booking,店員亦會預早5~10分鐘再打嚟confirm一下你嘅位置。全部對話店員態度都好nice.

上到去地方都算大,室外大約可以坐5~6枱左右,但所謂室外其實都有瓦遮頭,就算落雨都唔怕。到處掛上好有日式風味嘅紅燈籠,感覺似去咗居酒屋。


點完餐,店員送上一杯前菜,有青瓜、甘荀等,仲附上一碟好似麵鼓。


唔係用一般嘅石油氣/煤氣爐,而係選用類似炭精去燒,感覺幾得意~


等上菜期間,店員主動幫我加咗一個膠墊,遮住我嘅手袋,非常貼心呀!


好喇~係時侯睇下我哋點咗咩菜喇!第一個就係『日本蕃茄沙律』。一般生蕃茄,都有陣蔬菜嘅腥味,但依個蕃茄沙律完全冇依陣味。加上日式芝麻醬唔太濃,食落去好fresh~

我哋點咗左圖嗰個『海鮮黑毛和牛盛』,隻蝦大到呢⋯⋯有一隻手掌咁長呀~ 如果鍾意食牛嘅朋友可以叫右圖嗰一款『極上黑毛和牛盛』,就咁睇落去D牛肉脂肪分佈的好均勻!可惜依一盤唔係我哋叫,係送錯咗,oops~


依碟就係螺肉,比想像中嘅份量算多


當然唔少得我最愛嘅清酒煮蜆啦~ D蜆都幾大隻,但略嫌清酒味唔夠


帶子只得2隻,唔夠喉呀


海鮮盛唔止有帶子,仲有蟹腳⋯⋯


由於T小姐唔食得牛嘅關係,所以我哋令另外咗碟『果味芝士雞腿肉 』。芝士並唔係藏係雞肉度,而係做成一個偏稀嘅白芝士汁。


仲有『汁燒厚切豚五花』,燒完之後都好juicy


食咁多熱氣嘢,當然要啤一啤佢啦~ 嗰晚3個人坐係度傾計,本身店員話限時食2小時,但最後都冇迫我地走,結果我同P小姐每人飲咗3杯大啤,今次真係肥爆喇!


【總括食評】

味道:好過盛八,牛肉方面同和宴不相伯仲
環境:整體都唔錯,但嫌佢哋選用嘅櫈櫈背太矮,完全都唔可以倚住,想掛褸都好唔方便
服務:店員都好有禮貌,而且佢哋行過見我哋想夾起鐵板時,主動幫忙,又教我哋點咩醬汁會好食D
衛生:廁所衛生度唔錯,唔會淋泣泣,其他地方都冇乜問題
抵食:依餐我哋3個人食,埋單總共$1,412,即是每人平均$470左右,都唔算太貴!

有機會嘅話,我都想去多次!

★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆
你嘅支持,就係我嘅原動力,請畀個LIKE我喇~
個人Facebook Fan Page: https://www.facebook.com/Mind2Wild

歡迎大家跟我聯絡啊~
Email: mind2wild@gmail.com
★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆

留言


請按此登錄後留言。未成為會員? 立即註冊
    快捷鍵:←
    快捷鍵:→