【影評】片如其名,柒到核爆的《獵魔七煞》 Seventh Son

莎包Mind Too Wild 於 04/01/2015 發表 收藏文章
有睇看開包包影評嘅朋友,應該有留言我嘅筆風多數為書面語,但今次依套《獵魔七煞 》Seventh Son,真係爛片一齣,搞到我忍唔住要用返口語去寫觀後感,先可以洩憤!

【包包觀後感】
雖然睇過故事大綱都知係老土故事,諗住特技同打鬥場面可以幫補下,但睇左1/4已經開始覺得唔對路。首先,故事無理無尾,時代背景交代不清,一開波就講獵魔騎士Gregory將女巫Malkin封係一係好遍僻嘅地窿,隨著日轉星移,越近血月Malkin力量越黎越勁,好容易一嘢爆開個閘重返人間,故事開頭鬼死咁求其!

之後,為左要描述Malkin有幾勁,少不免要死人,所以Gregory教左10年嘅徒弟William被殺死。為咗報仇,Gregory就山長水遠搵傳說中擁有超凡能力嘅「第七子」。講到依度,到底咩叫「第七子」呢?點解佢又係最勁呢?嘿嘿...... 套戲做左1/3都係仲未有交代過,認真「好嘢」!

其實所謂嘅第七子,係指以前有一隊為數大約一千人嘅獵魔軍團,而軍團成家立室後,所生嘅第七個仔,就係「第七子」喇~ 但至於點解第七個會有越凡能力,就無講過(如果有朋友仔知嘅話,不妨留言話我知)。

男主角例牌由乜都唔識會變到好鬼勁,好可惜......佢由頭到尾都係雞到爆!臨尾之所以變得勁,都只係全靠佢個女巫阿媽偷返嚟翁斑石同師父畀佢支魔仗,咁樣阿豬阿狗都可以做大師喇!

咁都算喇~ 講又講到D妖魔好鬼勁,又刀王又刺客王,全部都可以幻化獸態,打得又嚇得,不過全部被人三兩野就K.O.咗,睇到真係想講粗口!

至於終極Boss 女巫Malkin,竟然被「第柒子」一把飛刀欄腰插中,咁就死鬼埋!俹簁 (乸西)到爆燈,睇完真係忍唔住 X 咗一聲!(.\_/ .)凸

【總結】
完全中伏之選,千祈唔好嘥錢入場,就算第時網上有得睇,都唔好嘥時間Download!

★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆
你嘅支持,就係我嘅原動力,請畀個LIKE我喇~
個人Facebook Fan Page: https://www.facebook.com/Mind2Wild

歡迎大家跟我聯絡啊~
Email: mind2wild@gmail.com
★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆

留言


請按此登錄後留言。未成為會員? 立即註冊
    快捷鍵:←
    快捷鍵:→