【影評】略走下坡的《變形金剛4:絕跡重生》Transformers: Age of Extinction

莎包Mind Too Wild 於 01/07/2014 發表 收藏文章
全城熱話嘅《變形金剛4:絕跡重生》終於上畫!由於今集喺香港取景,咁更加要買飛入場睇喇~

【故事大綱】
狂派與博派展開黑月之戰後,芝加哥幾乎被夷為平地。人類重過和平日子之際,一群野心科學家竟蒐集大戰後遺留下來的外星碎片,用以研發一種難以駕馭的全新科技;由此為地球引來另一次重大危機。人類面臨來自遠古外星的致命威脅,令博派不得不重回地球,展開驚心動魄的正邪激戰!

【包包觀後感】
嚟到第4集,換走咗大家熟識嘅Shia Labeouf,由《賤熊300》嘅Mark Wahlberg補上,故事上略有斷點!不過以Yeager 一家以執爛銅爛鐵為生,從而令柯柏文出場, 編劇係依個關口上都處理得唔錯~

可惜搵咗一個億萬富翁千金做花瓶,美貌同身材都唔及Megan Fox咁索,演技就更加唔駛講~

相反,李冰冰再次令人眼前一亮!早前包包喺《X-men : Days of Future Past》都講過李冰冰操一口流利英文,已大勝天敵范冰冰。加上今次 Transformers 4 全片長約 285分鐘 (即2.75 小時) ,李小姐有30分鐘戲份,認真架勢!(曲線讚自己有眼光XDD)

而其中一幕爆笑地見到呂良偉做大茄,仲要係深水埗街市位講價賣電單車。全場即時笑咗~ 但我心諗:「大佬~ 你估依度係羅湖咩? 無啦啦講價......」

反派方面,以往都係由麥加登擔大旗 ,今次卻由Grimlock (鋼鎖)客串。講真,身為80後嘅我已經唔記得有依個角色出現過。上網翻查資料先知,Grimlock隸屬恐龍巴特 (Dinobots),係博派嘅一份子 =__=" 依度會唔會改編得過咗火呢?

而且柯柏文幾次被打到爛哂,一劍穿心都唔死得, 轉個頭scan 一野又變返靚靚仔仔,神化到無朋友~ 相比起前兩集嚟講,劇情變得粗製濫造!

加上香港取景部份,眼利嘅香港人都發現只係得嗰啲密麻麻嘅樓、中銀、灣仔會展比較合實況!近尾段部份港島區大戰,無啦啦唔知點解會有個廢棄中式公園,仲要多咗香港根本無嘅單軌架空鐵路!外國人永遠只係識得咁樣 FF香港嘅.....

查實依度係 Detroit, MI市中心!!

慶幸入面嘅招牌無簡體字!

【總結】
  • 特技還可以~ 都係令人眼花撩亂
  • 劇情比前兩集薄弱,唔夠張力!
  • 博派同狂派中堅角色戲份減少咗,尤其係大黃蜂,大黃蜂迷會失望
  • 劇中好多「純粹」事件,情節接駁位有啲無喱頭 (即係無啦啦咁啱有欖球喺一個香港男仔屋企,講真香港有幾多會玩欖球呢?)
  • 整體我只會畀《65分》- 當中有15分係出於童年時嘅集體回憶!

【同場加映】
其實大家有冇諗過:當人類坐係變形金剛(汽車形態)入面時,佢哋一變身點解會無事? 正常應該被夾死的XDDD 大家睇片就知~

當然唔少得惡搞嘅圖啦~~ 好明顯依隻變形金剛係男性XDDD

★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆
你嘅支持,就係我嘅原動力,請畀個LIKE我喇~
個人Facebook Fan Page: https://www.facebook.com/Mind2Wild

歡迎大家跟我聯絡啊~
Email: mind2wild@gmail.com
★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆

留言


請按此登錄後留言。未成為會員? 立即註冊
  • JefferyChan 於 05/07/2014 評論 NO. 1

    不是Grimlock,是Lockdown吧

快捷鍵:←
快捷鍵:→