【#港生活】香港地道手工啤酒 - 「 Gwei.lo (鬼佬 )」 圖片

好開心之前可以去到佢地嘅「Tasting Room」試左整個系列,仲有好好人嘅「Ambassador - Henry 」介紹導賞。入到去我嘅第一個問題係:你地點解會叫「 Gwei.lo (鬼佬) ?」佢就話創辦人認為「 Gwei.lo (鬼佬) 」呢個字原本就係香港人專屬,係一個十分本地化嘅稱呼;而且希望可以重新定義香港啤酒,同時亦再定義『鬼佬』喺香港人心目中的形象。咁當然,試過好嘅嘢就一定要介紹俾大家啦〜
「Pale Ale」:口感清爽、酒精感低,帶著熱情果及荔枝等熱帶水果香氣;個人覺得同港人習慣飲嘅清啤接近,更係女性導向;最啱喺室內開大冷氣、雪到好凍,作為 Party Drink、用餐開首、配合餐前小食嘅第一支就十分唔錯。

「I.P.A」:用左歐洲麥芽、黎自南太平洋同美國嘅啤酒花;個性鮮明、口感 Smooth、比 Pale Ale 更複雜深厚;滲出夏日水果比如蜜桃、柚子跟白花香氣,帶有一種活力、躍動嘅感覺;若果襯上諸如各式天婦羅、炸魚薯條或泰式炸物等,用餐嘅第二道選擇。

「Wit」:即係我地所認識嘅小麥啤酒;香氣喺三款中屬於最甜美、厚實,例如熟透嘅芒果、椰絲、奶油,就好似 “ 芒果西米露 ”咁,負責人話好似 Corona 咁加粒青檸角會有另一種唔同風味;個人覺得消費者嘅觀感應該會係幾兩極化:「好鐘意同好唔鍾意,難有中間。」加埋好似叉燒、燒鵝等嘅蜜汁燒味餸酒,呢個組合應該會係幾唔錯嘅。
試過三款之後,老實講係唔係幾夠喉,就好似上面寫配食物咁,一餐飯都未去到主菜。不過,好彩 Henry 講話大概明年二月會有多兩款:分別係「Pilsner」及「Stouts ( 黑啤) 」,而我自己就比較期待後者。

啤酒、部分烈酒跟葡萄酒一樣都屬於釀造酒,而我會選擇寫 Craft Beer 嘅原因,其實因為覺得佢喺香港大眾心中嘅形象,同 Wine 有幾分相似:大家都係受眾較少且帶點點神秘;一罐普通啤酒只需要幾個大洋,咁點解要俾貴幾倍嘅價錢飲手工啤酒?慶幸嘅係呢幾「 Gwei.lo (鬼佬) 啤酒 」嘅售價同佢地個品牌名一樣親民,且品質不俗。我自己經常都會有一箱放喺屋企睇門口,若然各位讀者們都有興趣的話,可以 Inbox 小弟了解一下吖〜
部分圖片來源可能引自互聯網

---------------------------------------------------------------------------------------------------------------
Derekc:一個土生土長嘅80s香港人,過去的十年庸庸碌碌的工作、學習品酒到於德國葡萄酒莊工作、鐘情於葡萄酒生活態度並希望將其推而廣之;有過一段外地生活體驗、一場意想不到的人生。如果大家喜歡我嘅文章請點按讚及分享到你的社交平台;另外如果大家有希望想睇到葡萄酒題目亦歡迎聯絡我,又或者可以傾下酒經 〜

Instagram : https://www.instagram.com/derekc_c/

Facebook Page : www.facebook.com/Wine.Life.Style.HK

留言

會員
我要評論
請按此登錄後留言。未成為會員? 立即註冊
快捷鍵:←