【#酒後失言】 近乎 100% 高比例新橡木桶釀造的布根地 - 「Dominique Laurent 」 文字

“ Men’s Talk Night ” — 早前喺一個悶熱嘅夜晚,好兄弟為我帶黎左呢支 Fine wine;佢係一個鐘情於布根地 Pinot Noir 嘅愛酒之人,亦都係佢喺大約六年前將我領入呢個葡萄酒世界,之前有「結他」、「足球」,此後有「雪茄」、「Whisky」、「Golf」、「」甚至最近期嘅「傳說對決」等等,名乎其實係 “ 睇住你大,帶住你壞 ” 〜(≧∇≦)〜 講笑遮,真心感激你開闊我嘅視野!!
講番支酒,過左十二個年頭之後已經完全成熟,甚至開始有些微走下坡迹象;剛落杯就好似食緊朱古力甜筒咁 : ChocolateNuttyVanilla,飄著強烈又明顯木桶氣息,正正係 Laurent 幾乎所有酒都以將近 100% 的高比例新桶培養的大膽、非一般的 Burgundy 風格,亦都呼應著 2005 呢個優秀年份( Yielding Good Sugar Levels & Ripe Tannins );酒體厚實、深色,直到中後期果香才開始 Show up,飲落去就好似有個大大嘅烈炎紅唇 Kiss 你咁;個人非常欣賞此酒的 Aromas,更可惜嘅係酒體與口感未能達致平衡,但以一支村名酒而言已經絕對係物有所值。
引用Dominique Laurent Gevrey Chambertin Vieilles Vigne 2005

或者你會想知道更多關於 「Dominique Laurent 」:

Laurent 曾經擔由過西點師傅,但由於對釀酒有無比的熱情與執著,90 年代初就去到 Nuits-St-Georges 成立自己嘅酒商公司,向指定酒農購買葡萄或原酒到自己酒窖內釀造。而為左確保擁有最優質嘅橡木桶,佢亦直接創建自己嘅製桶廠於 Tronçais 森林挑選平均樹齡 300 年的橡木製桶;這些木桶除了他自用之外,亦有少數賣予頂級酒莊諸如「DRC」、「Zind Humbrect」、「Clos Mogador」、「Pingus」及 Robert Parker 有份投資的「Beau Freres (Oregon)」等等,被公認為世界最佳的製桶廠之一,而品酒大師 Michel Bettane 更稱之為 “ Magic casks ”
除左運用木桶技巧以外, Laurent 亦堅持對葡萄酒釀造作最少嘅人為于涉:例如當酒完成後不加入二氧化硫、不經澄淨過濾、採用人手裝瓶等;加上 Laurent 認為 Winemaking 只不過係一個必要嘅過程,目的係用黎幫助葡萄酒發展更多層次跟複雜性, 但同時又忠實呈現不同 Terroir 的獨特色彩。

關於「Vieilles Vigne」:

簡稱「V.V」。呢個法文 Terms 其實係代表葡萄産自年老的樹藤 ( Old Vine ), 目前在官方定義中並無解釋喺乜嘢條件底下先可以列為 Vieilles Vignes,例如葡萄樹要種植幾多年以上,甚或每年平均產量要少於某個數目等等,所以可以話係「觀感」多過實際 …. 不過據我所知,到目前為止業界都相當自律,基本上年過 50 - 60 嘅葡萄樹先會被列作「V.V」級別。不過若然你問我會唔會有 “ 偷雞 ” 嘅情況出現呢?印著「V.V.」的葡萄酒相對而言定價會更加進取,利字行頭,就真係只可以靠酒商自己自律喇!

*Pictures sourced from Internet *

---------------------------------------------------------------------------------------------------------------
Derekc:一個土生土長嘅80s香港人,過去的十年庸庸碌碌的工作、學習品酒到於德國葡萄酒莊工作、鐘情於葡萄酒生活態度並希望將其推而廣之;有過一段外地生活體驗、一場意想不到的人生。如果大家喜歡我嘅文章請點按讚及分享到你的社交平台;另外如果大家有希望想睇到葡萄酒題目亦歡迎聯絡我,又或者可以傾下酒經 〜

Instagram : https://www.instagram.com/derekc_c/

Facebook Page : www.facebook.com/Wine.Life.Style.HK


留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→