【#酒知識】從醜小鴨變天鵝,“阿根廷” 黎個華麗轉身【導讀篇】

問:「講起阿根廷呢個國家,你地會諗起 D 乜嘢?」
我會即時諗到足球相關,美斯、馬勒當那,食物可能係烤牛扒、豬肋骨,同埋喺好多年前治安好差等等。有讀者可能會懷疑:「乜呢個國家有釀造葡萄酒嘅咩?」的確,明白係有點難想像嘅,特別係喺學習葡萄酒之前,我自己都唔知;不過,其實早喺 2005 年阿根廷就已經成為世界第五大生產國。如果你覺得佢地嘅葡萄酒唔入流、不值一飲,咁就錯喇!只要上網 Check 下,就會發現愈黎愈多得到酒評家 90+ 以上的優異分數,而且對比起歐洲傳統産酒國,喺某程度上甚至擁有更高物值跟性價比。
事實上,呢個國家喺釀造 Wine 嘅歷史可以追溯返去十六世紀,當時來自秘魯嘅傳教士喺修道院周圍種植葡萄,以確保彌撒聖祭中有葡萄酒可用。之後隨著西班牙殖民美洲,生產歷史亦正式開始。傳統上,阿根廷嘅葡萄酒生產可以話係 “ 重量不重質 ”,其產量甚至超過歐洲以外嘅所有國家,但品質就不足以出口;直到 1990 年代後期,品質上取得嘅大躍進後開始出口,至現在為南美洲最大的葡萄酒出口國,同時亦係「新世界葡萄酒」嘅標誌性國家之一。
由地理位置黎睇,阿根廷嘅產酒區可以由北到南劃分成三個大區域:

  1. 北部地區:主要為「Catamarca」、「Salta」、「Tucumán」
  1. Cuyo 地區:主要為「La Rioja」、「Mendoza」、「San Juan」
  1. Patagonia 地區:主要為「La Pampa」、「Neuquén」、「Río Negro」

其中 Cuyo 地區嘅 Mendoza 省可謂心臟地帶,擁有絕佳的種植環境、占全國總產量約 60%,現為阿根廷國內最大嘅葡萄酒產區,亦係出產高品質葡萄酒的搖籃地;至於 San Juan 省則屬第二大產區,出產嘅葡萄酒亦屬優良;當地有著一系列相鄰的山谷,種植區海拔從 1200米到 1600米+,適合種植多款葡萄品種。值得注意嘅係,根據阿根廷嘅法規,若然葡萄品種名稱標示喺酒標上面,咁至少就要用上 80% 該品種;而剩余嘅 20% 則視乎情況混合其他品種。
上面提到早期嘅阿根廷葡萄酒業骨幹係高產量,帶粉紅色嘅「Cereza」跟「Criolla Grande」品種由於産出量高且帶有明顯甜度,傾向釀造成粉紅色或較深色白葡萄酒、以一公升紙包盛裝或濃縮葡萄汁形式出口到日本,所以時至今日仍佔種植面積近 30%。去到二十世紀末,由於其生産重點放番喺能夠出口嘅優質葡萄酒上,所以「Malbec」就能夠突圍而出,成為種植最廣泛嘅紅葡萄品種,其次係「Bonarda」、「Cabernet Sauvignon」及「Syrah」;至於「Torrontes」、「Moscatel」及「Chardonnay」等白葡萄酒則係物值高、價廉物美嘅優質之選。
作為第一篇導讀,今次主要係想俾各位對 Argentinien Wine 先有一個概念,而之後再寫嘅【白酒篇】及【紅酒篇】則會主力同大家去睇下,兩款原本不受 Origin Countries 重視、被認為低人一等嘅葡萄品種 -「Torrontes」跟「Malbec」,越洋喺黎到阿根廷之後點樣黎個華麗轉身,重身踏上國際舞台。

引用法國酒標介紹嘅文章告一段落之後,有人問我接著會寫乜主題:「其中一位酒友留言話,佢嘅家人都有留意小弟嘅作品、經常問翻佢轉頭;亦有朋友提醒我,要為之前答應過要介紹嘅白葡萄品種『Torrontés 』找數」;其實寫關於葡萄酒嘅文章都真係幾冷門,受眾少、多文字同比較悶;抱著一個純分享嘅心態,希望可以用最簡單嘅文字推廣葡萄酒文化,再次衷心感謝各位支持!

Derekc

*部分圖片來源引自互聯網 *

---------------------------------------------------------------------------------------------------------------
Derekc:一個土生土長嘅80s香港人,過去的十年庸庸碌碌的工作、學習品酒到於德國葡萄酒莊工作、鐘情於葡萄酒生活態度並希望將其推而廣之;有過一段外地生活體驗、一場意想不到的人生。如果大家喜歡我嘅文章請點按讚及分享到你的社交平台;另外如果大家有希望想睇到葡萄酒題目亦歡迎聯絡我,又或者可以傾下酒經 〜

Instagram : https://www.instagram.com/derekc_c/

Facebook Page : www.facebook.com/Wine.Life.Style.HK


留言


請按此登錄後留言。未成為會員? 立即註冊
    快捷鍵:←
    快捷鍵:→