【#酒知識】識睇酒標仲未夠?!想揀啱心水葡萄酒開餐,就要由分級制度入手【法國篇 ( 二 ) 】 圖片

葡萄酒標 ( Etiquette ) 係遵循一定規則、記錄該酒各項訊息嘅「出世紙」,亦都可以話係佢嘅「履歷表 (Resume)」。有睇過上一集、簡單介紹過點樣去閱讀法國葡萄酒標,相信大家對於憑藉標籤揀酒已經有左基本認識。不過呢樣都只係避免中伏嘅第一步:若果套用落人類社會,就算俾你知道 “ 邊個係佢父母 ”、“ 佢喺邊度出生 ”,都唔代表可以了解佢嘅「能力 (Ability)」或「潛力 (Potential)」;所以,人類社會會有「教育程度 (Education Level)」,而葡萄酒則有「分級制度 (Classification)」為品質作初步把關。
據聯合國糧食及農業組織統計,2014年全球葡萄酒總產量約 2,900 萬公噸,而法國則排名第三約 420 萬公噸。咁大産量係咪每支都係優質?當然唔會囉!所以難免會有分評等級,不過當初設立嘅出發點並唔係為左方便大家揀酒。制定相關規定嘅契機,係源於二十世紀初葡萄失收及經濟危機雙重打擊。而且,冒充産地名聲嘅 “假酒” 充斥市場,對法國 Wine Industry 造成嚴重衝擊。為左加以抵制,就決定推行分級制度以守護原産地的傳統;目前歐盟 (EU) 主要將葡萄酒分為「日常飲用」及高品質「優質法定産區」兩種,而各國就喺呢個基礎上再各自制定相關法規。
上圖為法國著名産酒區域,若論主流的話大概可分為九個,而喺 “大規範” 底下每個地方其實亦會有自己嘅一套分級制度,單講一個波爾多就已經有:1855年分級制度(Grands Crus Classes En 1855 Medoc & Sauternes)、格拉夫分級制度(Crus Classes de Graves)、聖艾美隆分級制度(Grands Crus Classes de Saint-Emilion)等等等等 …. 不過,仔細繁複嘅地區性分級就唔講咁多住,今次主要先同大家介紹下 「General French Wine Classification」
早喺 1935 年,法國通過左一套嚴格的分級與品質管理體系法規,將葡萄酒按質量層次分成四個等級;一直沿用到 2009 年,為左配合歐盟嘅新酒法,舊有分級制進行了改革,將原來的「4」 個級別變為「3」 個,而喺市面上消費者仍會見到 2009 年前出産依然用上舊標示。
法定產區葡萄酒(AOC/AOP ): 原產地地區的葡萄品種、種植數量、釀造過程、酒精含量等都必須得到專家認證,且只可用當地種植的葡萄釀製,絕不可跟別處的葡萄混釀。嚴格的酒法確保了始終如一的高品質,而 AOC (Appellation d’Origine Protégée) 葡萄酒都會喺酒標上標識出其法定產區; 此等級屬法國葡萄酒的最高級別,約佔法國葡萄酒總産量的 45%。
優良地區葡萄酒 ( IGP/VDP ) : 通常係指向一個較大的區域且多會標有葡萄品種以及區域 (Indication Geographique Protégée)。而其規管條件則略低於AOP,包括生產地區、葡萄品種、最低酒精度、每公頃最高產量、栽培管理措施、釀造方法等;至於「Vin de Pays」一詞則是 IGP 的歐盟前版本。被評為此級別之葡萄酒,於品質上相對 AOC/AOP 而言較為次一步,約佔法國葡萄酒總産量的 33%。
日常佐餐葡萄酒(VdF) :前身為 Vin de Table ( VdT),混合多種或不同地區的葡萄釀製,或是不同產地、甚至係以不同國家生產的原酒調配而成。標籤上印有 “ Vin de France ” 的葡萄酒可以源自法國任何一個地方或地區且經常以葡萄品種作標註,屬分級制度下最低檔次之葡萄酒,約佔法國葡萄酒總産量的 13%。
又頭痛?都係正常嘅〜!若然問個人意見的話,我會認為有分級制度係一件好事,因為呢樣嘢最起碼俾到消費者一個指標去選擇同認證 (當然時下假貨 D 像真度都好高);不過換個角度睇,我又覺得咁多咁繁複嘅 Classification 同時亦會令大眾對學習葡萄酒卻步,淨係睇我寫「酒標」呢條題目都要分開三次都可略知一二 …. 亦都係因為有高低之分,酒商又可以從中推高售價,就等於學歷較高嘅人係比較低嘅人收入更多,理論上應該係咁講。
我都係講嗰句:「求人不如求己」;若然依靠酒鋪店員推薦佢地想 Sell 嘅嘢且未必啱心水,倒不如自己動手揀。畢竟黎到宜家呢個資訊爆炸時代,想學葡萄酒已經唔再係一件難事,而且亦都唔係高階貴族嘅專利;無論係「男」定係「女」「藍領」定係「白領」,只要願意放多少少心機,你都可以成為一個 “品酒師”。至少,都可以為揀啱心水葡萄酒開餐、減低中伏機會再進一步吖〜

*部分圖片來源引自互聯網 *

---------------------------------------------------------------------------------------------------------------
Derekc:一個土生土長嘅80s香港人,過去的十年庸庸碌碌的工作、學習品酒到於德國葡萄酒莊工作、鐘情於葡萄酒生活態度並希望將其推而廣之;有過一段外地生活體驗、一場意想不到的人生。如果大家喜歡我嘅文章請點按讚及分享到你的社交平台;另外如果大家有希望想睇到葡萄酒題目亦歡迎聯絡我,又或者可以傾下酒經 〜

Instagram : https://www.instagram.com/derekc_c/

Facebook Page : www.facebook.com/Wine.Life.Style.HK

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→