【不是影評】緣路山旮旯:要唔要重新連結?

25°C Journey 於 10/08/2022 發表 收藏文章

電影宣傳tagline係 “香港真係好靚”,但我睇完其實唔太覺得拍得啲地方好靚,或者我本身對土地無太大連結,又或者香港真係太熱,就算香港真係好靚,我都唔係太想行出無冷氣嘅地方(sorry林超英🙂)。

不過,我有被連結,我都覺得戲院入面嘅觀眾有被連結。畢竟100分鐘入面,大家有一齊笑咗好多次。愛情小品做到咁,合格有餘啦。

有被連結嘅位係貼地囉、本土囉。

呢套戲嘅用語、劇本設定、節奏、笑位etc 如果賣去大陸或者台灣,觀眾唔會睇得明,係拍畀香港人睇嘅。就係本土囉。

至於貼地,就係research做得好足。

我屋企喺康盛花園附近嘅,完場之後我google咗康盛花園去梅子林,真係exactly要四個鐘頭兩分鐘。
當然唔止呢啲細眉細眼嘅位,入面講茶果嶺歷史、梅子林駐村藝術家、澄碧邨新聞,全部都有根有據。
睇睇導演係咩料(sor 我真係孤陋寡聞嘅),公開大學人文社會科學院高級講師,拍過港台外判單元劇同紀錄片,包括<獅子山下>,唔怪得啦。再回想好似入咗異度空間咁嘅 <I.SWIM>就好明白劇情可以虛構但research要做足嘅重要性。

唔好意思,我知其實冇乜好比,但我仲未嬲完 <I.SWIM>。

而我覺得最有驚喜嘅位係,五個女角色雖然篇幅唔多,但好立體,性格設定終於似返呢個香港嘅現代女性。
到底我哋睇咗幾多年英雄救美、嫁個好老公、bitchy港女、八卦OL、賣弄美色 etc呢啲either一式一樣 or 性格模糊嘅女角色?戲入面五個女角色代表五類現代女性,仲好可能係連登仔最憎嗰啲添。不過拍出嚟一啲都唔討厭,或者正正因為男主角係岑珈其,如果女角太完美反而唔合理;亦正正男主角係岑珈其,佢冇搶到女角嘅鎂光燈。一男五女,竟然做到平衡。(期待呢個point有更多討論)

總括而言,值得一睇嘅。如果你本身對呢套戲冇興趣,又或者睇完之後覺得唔好睇,可以試下問自己一句 - 要唔要重新連結?連結返呢一刻香港嘅人同事。

如果喜歡我們的文章,請即分享到︰

標籤: 緣路山旮旯  電影  

留言


請按此登錄後留言。未成為會員? 立即註冊
    快捷鍵:←
    快捷鍵:→