【文仲.文中有話】情人節睇咩戲好?《死侍》一次過滿足你三個願望

4media life 於 14/02/2016 發表 收藏文章
筆者本人一直都好鐘意睇荷里活嘅英雄片。《Deadpool》作為2016年同埋猴年嘅第一套英雄片,的確係好有新鮮感。首先,係佢嘅宣傳海報上面都見到大量你唔會係其他英雄片見到嘅字眼。上面一堆「大支嘢」,「串串貢」,「你老母」。再加上佢係一套三級片,你已經可以估計到,佢嘅鏡頭同對白都會同其他嘅完全唔一樣。

先講下成套戲最重要嘅嘢,無錯,就係英雄啦。男主角係偏平民,並唔係咩大富大貴又或者咩科學家。而拎到異能嘅過程亦唔係佢所預期嘅,因為身有癌症而俾人進行身體改造。依個背景同蜘蛛俠係有啲相似。Deadpool雖然係一個成年人,但唔係比Peter Parker 成熟好多。不過佢把口就抵死同賤好多,係同其他配角嘅互動亦生動有趣得多。能力唔算好特別,係老套嘅自我復原。不過因為本身係退伍特種部隊成員,對槍械同刀會好有經驗。用日本刀做武器嘅造型有幾幕都好撚型。

電影整體劇情唔算有太大亮點,不過身為死侍系列第一集都預左係交代背景比較。而睇左預告嘅已經可以得知,死侍系列係屬於X-MEN系列,而從對白上亦可以得知係屬於”Days of Future Past”後嘅第二世界。希望期待下集會同X-MEN系列會有更多交流,劇情上會有啲關連。
作為一套新春檔同情人節檔會上嘅戲,佢一啲都唔失禮。角色嘅性格同對白十分搞笑。當中更有部份笑話係打破左第四面牆,即係角色會以觀眾嘅角度講嘢,會有一種「正想咁講」嘅親切感。亦一如劇中所講,依套戲似愛情片多過英雄片。你會見到唔少冧到爆嘅場面同對白。

但好似之前講過咁,因為依套戲係近似愛情片(再加上係小本制作),打鬥場面唔算好精彩。其中一個原因係對方嘅能力真係平凡到爆。除左一堆雜卒之外就得三個角色。一個一睇都知唔打得嘅Sales,一個一睇就知得蠻力嘅男人婆同一個自稱有神速反應但成場都突顯唔到嘅最終大佬。係成本同敵人能力有限嘅情況下,電影以真實(血腥)作為打鬥嘅賣點都十分合理。

筆者其中一個鐘意睇英雄片嘅原因就係鐘意睇英雄嘅心路歷程。作為近年嘅經典,《蝙蝠俠》同《蜘蛛俠》係依方面做得非常之好。點解要做英雄,乜嘢係英雄同點樣先算係英雄……仲有好多簡單得嚟但好有發揮嘅問題,依啲都係筆者鐘意睇同諗嘅。但比較可惜嘅依套戲並無涉及太多。男主角想對抗壞蛋嘅原因好簡單,想復仇同想救番條女。係最後果度有人想勸男主放過嗰個最終大佬,男主都係揀左手起刀落。依個亦好連戲,符合主角一直主張隨心所欲嘅性格。希望下集會有一啲佢依個性格同英雄嘅責任之間嘅衝突睇。

整體嚟講套戲係好好睇嘅。一套有笑片愛情片元素嘅英雄片絕對可以一次過滿足你三個願望。如果要我好行咁評分,5星滿分我會比4.18粒星。希望編輯會幫我補番張五粒星入面有四點一八粒星係塗黑左嘅圖上去啦。(編按:請作者下次交一篇400.18字的稿來,OK?)一如以往啦,片尾藏玄機。

P.S.1 筆者去睇果場啲工作人員係散場果陣講左套戲入面其中一個對白嚟叫我哋散場,果下勁正。
P.S.2 筆者係買完飛先發現Twitter原來有講12號後嘅會有第二段片尾,而我係睇果陣仲係得一條,蝕撚左。

——————————————————————————
專欄 「4 media life」 fb page:
https://www.facebook.com/4-media-817512625060838/?ref=hl

如果喜歡我們的文章,請即分享到︰

標籤: 死侍  Deadpool  英雄片  情人節  

留言


請按此登錄後留言。未成為會員? 立即註冊
    快捷鍵:←
    快捷鍵:→