【文仲.文中有話】節奏緊湊的驚喜之作——《天眼狙擊》(Eye in the Sky)

4media life 於 12/07/2016 發表 收藏文章
係睇更多精彩內容之前,不妨follow我們專欄的fanspage呀!
4 media life fb page
——————————————————————————————
今日想講下“Eye in the Sky”(《天眼狙擊》)。依部電影比我想像中好睇。初初一聽佢個中文名,天眼狙擊,以為又係果啲咩大美國主義嘅片。主角光環打到好似啲超級英雄咁,遇神殺神遇佛殺佛咁。

點知一睇,發現原來唔係一部動作片(睇完套戲上網睇番介紹係寫驚悚片)。 相反,佢爆破同槍戰嘅畫面係少到爆。反而成套戲都係一套政治片。軍、政、法三方不停係度角力。大家都有自己嘅論點同擔心,三方都希望拉攏對方,但現實卻係不停嘅妥協。隨住戰事不停咁變化,三方嘅立場時強時弱,一直都分唔到勝負。作為觀眾嘅我,好快就已經搵到同自己理念相近嘅角色。每當佢勢弱果陣會替佢擔心,當佢勢大果陣會想佢成功。依種投入感係我睇之前係絕對想像唔到。

聽落雖然好美好,但現實係殘酷嘅。三方雖然有好多唔同嘅論點,但出發點都離唔開唔想揹鑊依一點。軍方要完成行動目的,法方要確保一切行動合法,政方要所有嘢按程序做。當三方都搵到個折衷嘅方法之後,係面前出現係另一面高牆,人性。

係高層用上帝視點係度唇槍舌劍緊果陣,前線嘅士兵卻係要以身犯險,每分每秒都可能隨時死亡。正正因為有左前線嘅戲份,就會令觀眾覺得心急如焚,希望快啲有個決定令前線嘅人唔駛再進退兩難。依點,係其他差唔多類型嘅文戲做唔到嘅。

***************下面開始會有少量劇透*************************

係咁多句對白入面,當中有一句我真係十分之深刻,大約係咁啦:「自殺式恐怖襲擊殺左80人,責任係恐怖份子。但如果為左阻止依件事而誤殺左個細路女,責任係我哋度。咁樣,我哋就會係傳媒上面輸左。」一聽到依句,我個心真係即刻Down左一下。屌你老母,咁撚諗嘢都得?咁成立軍方把撚咩?但諗深一層,依句係講得無錯。如果佢哋就咁撤退,其實唔會有人知道政府曾經有能力阻止依個恐怖襲擊,無人會責怪政府。輿論戰將會好打好多。即使我都仲係屌緊果條友老母,我心入面都有少少明白佢點解咁諗。

成套戲仲有另一個好值得研究嘅位,就係無人戰機嘅引入。換番科技無咁發達嘅時代,前線士兵受到嘅風險係大好多倍。依個時候,好多時都係由士兵現場判斷當時環境如何,什至會有可能因個人安全理由而直接開火。但換左無人機之後,士兵無生命危險,就會多左好多時間比班高官諗其他層面嘅嘢。本來只係軍方嘅事,變到軍政法三方嘅事。戲入面都有講過,軍方會將士兵安全放係第一位。但用左無人機之後,依樣嘢就會唔存在,咁咩會成為新嘅第一位呢?而換左依種無人機之後,係軍事決定上又需要做咩修改呢?

總括嚟講,套戲唔算特別深層次,但勝在夠淺白易明,節奏緊湊。絕對算得上係驚喜之作。

PS:其實睇左少少就知依套一定唔係美國片,因為美國一定唔會肯醜化政府。

——————————————————————————————
想了解更多精彩內容,記得follow我們的專欄啦!
4 media life fb page

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→