自給自足的「大山」

復活節假期老豆話想番鄉下行下，咁我見我幾年冇返過去，所以就執左兩件衫跟佢番去住兩日。雖然我幾年冇返過去，但我對鄉下印象一啲都唔陌生，我鄉下既生活唔稱得上落後，平時番到去睇下電視、出去行下咁就一日，對於我地呢啲「城市人」黎講梗係悶啦，可能我個悶樣太黑人憎，今次番去我表嫂就聊我去佢鄉下玩下。
我表嫂鄉下叫「大山」，個幾鐘車程就到。去到大山，明顯有一種與世隔絕既感覺，主車路隔離有條路仔入村，村民自成一角。

到步後就去左表嫂屋企，佢問我想去邊玩，咁我就叫佢比啲選擇黎啦，我人生路不熟。之後佢問我想去捉魚定打獵，我聽到真係嚇一嚇；捉魚就一啲都唔surprise既，因為我鄉下本身有幾個魚塘，我細細個已經跟啲大人去捉魚食。但聽到打獵果下即刻精神曬， 我就問佢用咩打、打啲咩，佢話用風槍，上到山見到咩打咩。

後尾傾傾下發覺原來大山呢條村大部分人都冇做野，每戶人都有種菜，大家都會去水庫捉河鮮、上山捉野味，過自給自捉既生活。條村四面環海，仲有個大水庫，就係呢啲珍貴既資源養活左成村人。