【做到精明打工仔】打工仔慳錢有計


喺香港生活真係好辛苦,唔係個人意見,外國都有唔少報告講過香港生活指數高㗎!特別係對於我地呢啲拎住份「餐揾餐食餐餐清」嘅打工仔,食咩買咩真係要諗過度過。如果一唔小心失手洗大咗,就真係大鑊!但其實想慳啲洗,只要從微細嘅地方入手,都唔係好難㗎咋。以下針對4項方面嘅建議醒吓大家,等大家做個醒目慳家打工仔!

1. 交通
有加冇減嘅交通簡直佔我地開支嘅大部份。要過海返工,仲再貴啲添!如果每程車費要俾多過$10.6,買價值$425嘅都會票就可以搭足四十程車!除此之外,睇下附近有冇一部叫「港鐵特惠站」嘅機,每次拍卡當日嘅下一程車都有$2優惠。

另外,仲有一個精打細算到極致嘅方法,但就要俾多少少時間同腳骨力。舉個例,九龍塘同樂富兩個站大約相距二十分鐘路程,但兩站去尖沙咀就收唔同價錢—九龍塘出發成人八達通收費$6.7,但由樂富去就要俾$8.2。

2. 飲食
最慳錢當然係帶飯!一餐自家製、健康、冇味精嘅午餐,唔單止補充能量,仲慳唔少。當十年前平均廿幾蚊一個餐,到依家要成四十幾五十嘅時候,就知道食又洗左我地班打公仔好大部份!有時有啲office工喺中環、金鐘呢啲貴價地區,每次食飯睇到張單都肉赤呀!依家有愛心飯盒,今日食肉餅菜心,聽日食冬瓜蝦米炒粉絲⋯⋯成本廿蚊唔洗,抵過去食下午茶餐!

假如真係好唔想帶飯,就留意下有咩平靚正嘅午市套餐。有時去小店同啲店員老闆混熟咗,話唔定會醒啲優惠俾你㗎!

3. 消遣活動
返工咁大壓力,放工放假當然要做吓自己鍾意做嘅嘢輕鬆吓。有啲活動,如果唔洗俾錢就做到,梗係唔俾啦!好似跑步,落樓下公園或者去海旁跑,比喺gym room更過癮!另外仲可以去行山、去海灘玩⋯⋯親親大自然真係唔錯㗎!
至於唱K睇戲,如果唔介意,可以買或者租碟返屋企,一大班friend share,無限時咁玩個多,正!

4. 購物
網上購物愈來愈方便,愈來愈平。好似淘寶、GMarket⋯⋯有啲新會員登記仲送購物優惠,唔嫌煩可以申請多幾個帳戶添。

假如對實體購物情有獨鍾,睇下有冇big sale再買都唔遲㗎!甚至聽過有人去某啲外國服裝店,著完襯未過七日退貨期退翻件貨。不過咁麻煩到人地就自己諗諗好唔好慳成咁喇。

所謂積少成多,日日持之而恆,都慳到夠食多幾餐好㗎!再慳多啲仲夠去旅行添!不過唔講咁多住,做嘢先⋯⋯

文:小C

更多打工仔分享,追蹤 ECjobsonline 專頁 或 瀏覽 www.ECjobsonline.com

留言


請按此登錄後留言。未成為會員? 立即註冊
    快捷鍵:←
    快捷鍵:→