X

年金大比拼懶人包 幫你輕鬆退休

打工仔辛辛苦苦大半世,都係為咗退休之後可以安享晚年,先唔好講生活居住環境急劇轉變,淨係物價通脹都分分鐘令你嘅如意算盤打唔響,至於你完全冇概念,諗都冇諗過退休生活係點?而家Mark實小編睇定啱啱好!

例如小編樓下嘅保安伯伯,點解65歲都仲要做多幾年?除咗因為佢身壯力健,原來交租食飯都用咗佢成萬蚊,強積金或者老人津貼都唔夠兩囗子用,如果你想真真正正退休之後唔使憂,選擇適合自己嘅投資方法絕對幫到手!

解構公營年金
所謂自製長糧到終老,眼見人口老化成為全球大趨勢,其實好多國家已經做緊,香港政府都終於出招,有政府做擔保嘅「香港年金計劃」由香港按揭證券公司推出,首先,公營年金屬於保險產品,4厘內部回報率,點都高過擺喺銀行做定期,入場費起跳五萬蚊就可以,最高一百萬,要一筆過交晒,計劃只接受65歲或以上長者投保,假設65歲買,之後嗰15年,每個月計收年金$5,800就回本有突,79歲後開始已經有賺,至於投保五萬蚊就大約係月收三百幾蚊。而年金本質係保險產品,投保人愈長壽愈着數,終你一生每個月穩定收年金,若然投保人早過80歲身故,本金未派哂,指定受益人都可以按月或一筆過收取餘下現金。

公營年金私型年金強積金逆按揭股票
入場成本
回報
風險
靈活性

小編精心搵咗幾個市面上適合退休嘅投資方式幫你嚟個大比拼!
假設你個人65歳揸住一百萬,玩法係(五★最高/一★最低):

公營年金 vs 強積金
公營年金★★★
強積金★

公營年金
好處:終你一生每個月穩定收年金,接近零風險,入場本金低。
壞處:如果要中途斷供攞返啲錢就附帶一定條件,例如係攞唔足本金,靈活性不足,而每個月收取相同年金,利潤面對通脹變化時只會下降。

強積金
好處:可自己安排資金流向,比較靈活自主。
壞處:同樣每月從中提取5800元,健康長壽人士有一定風險,計一計15年後如果仲存在係呢個世界上,啲錢用晒你食咩呢?

公營年金 vs 私營年金
公營年金★★
私營年金★★

公營年金
好處:有政府擔保接近零風險。
壞處:本金低利潤都會低,欠缺靈活性,本金需要一筆過全數投入計劃,而且冇伴隨其他入息保障嘅彈性選擇。

私營年金
好處:出面街外保險公司做緊,冇限住65歲先可以買,有啲18歲已經可以買,唔使一筆過比晒一百萬做本金,靈活性高,聲稱如果早啲開始供就可以早啲開始滾大嚿錢,預期嘅利潤更多,及有其他長期病嘅入息保障。
壞處:冇政府擔保,中途斷供亦會有其他附帶條件。

公營年金 vs 逆按揭
公營年金★★
逆按揭★★★★

公營年金
好處:相對冇乜風險,本金可自由選擇多少。
壞處:利潤較低最多都係5,800,而且年齡有限制靈活性不夠高。

逆按揭
好處:不求人靠自己,簡單講逆按揭即係將已經供斷嘅物業按俾銀行,供咗幾多錢可以攞返幾多嚟用,有瓦遮頭又有現金用,戶主可以住到百年歸老,之後家屬仲有權向銀行贖返層樓,風險不高。
壞處:層樓按左比銀行,靈活性唔高,身故之後如果冇繼承人/或者家屬冇咁多資金返層樓,樓宇就會歸銀行所有。

公營年金 vs 投資股票
公營年金★★★
投資股票★★

公營年金
好處:本金兩者差唔多,只係勝在風險極低,坐定定等收錢。
壞處:講利潤,同傳統收息藍籌股比較,年金息率與公用股息率差唔多,係冇乜太大增長性。

股票
好處:幾時入手離場你話事,靈活性高,遇上牛市利潤隨時double up。
壞處:65歲以上人士風險承受能力會低啲,相對要用較多時間睇住個市,股票呢樣嘢可賺可蝕,太刺激要小心身體!

最後,投資嘅嘢小編自己就唔會將所有雞蛋擺喺同一個籃,再提返各位,一切都係計數,審慎評估/比較乜嘢先係最適合自己再作決定,或者搵返專業嘅理財顧問幫你投資,輕鬆退休不是夢!

文:金金

更多打工仔分享,追蹤 ECjobsonline 專頁 或 瀏覽www.ecjobsonline.com

如果喜歡我們的文章,請即分享到︰

標籤: 年金  強積金  公營年金  逆按揭  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→