【打工仔健康】5大食療幫你擊退痘痘

夏天日日都熱到成身汗，女仔最怕就係去到邊都咁多塵，天氣又咁翳焗，成日都搞到塊面油立立，真係一個唔覺意就好容易出暗瘡。但香港夏天本身就潮濕到不得了，仲搽咁多黐立立的護膚品落塊面度，啲暗瘡分分鐘等十幾日都唔散！其實想擊退痘痘，又駛乜嘥咁多錢搞咁多野，只要揀啱食材，自然就可以由內靚到外啦！
1. 薏米海帶湯
薏米有改善皮膚的作用 ; 而海帶就無論係洗淨後冰敷，定係飲用都有消除暗瘡的果效。連同合桃、杏仁和杞子等一齊煲湯或者煲粥食，都能夠有效清熱解毒、活血化瘀、養顏和預防暗瘡。

2. 山楂綠豆湯
山楂可以幫助促進血液循環 ; 而綠豆呢啲豆類食品就可以抗感染和清熱解毒，兩者一齊煲湯飲仲有消暑的功效，啱曬夏天當飲品飲啊！

3. 西芹蕃茄青菜汁
西芹同樣能有助促進血液循環 ; 而蕃茄和青菜類則可降低皮膚裡面的油脂成份。榨汁後飲用有清熱解毒、下火、預防暗瘡和養顔爽膚的功效。大家仲可以加入唔同的蔬果轉換一下口味添！唔同蔬果對人體有唔同的好處和功效架！
4. 紅豆百合薏米水
頭先都有提到，薏米能有助改善皮膚質素，可以幫助祛斑、祛暗瘡和消除粉刺，令你的皮膚有番曬光澤 ; 而紅豆就有利尿、排毒、祛水腫和清熱解毒的作用 ; 百合都唔差！同樣有清熱、促進新陳代謝和美顏的果效。煲埋一齊飲簡直就好似食緊紅豆沙一樣咁滋補，大家仲可以依個人口味加啲蜜糖落去吊下味添！

5. 黑木耳紅棗湯
黑木耳有促進血液循環、健脾益腎和排毒美顏的作用，加埋紅棗一齊煲湯飲仲可以祛斑、保持肌膚濕潤滑膩和防止皮膚老化！真係女士們的一大補品！唔係生暗瘡都要飲番幾碗至得！不過出血患者、遺患腹瀉期間和孕婦就唔好食黑木耳喇！而且記住黑木耳並不能與蘿蔔和螺肉等一起食用。
護膚美顏是女士們一生的使命，而貪靚亦都係人天生的本能之一，但要維持一個靚樣，唔應該只倚賴護膚品呢啲非天然的化學物質。其實我地身邊就已經有好多純天然、價錢仲一啲都唔貴的養顏食品，調理好身體脾胃功能，皮膚先會由內靚到外架嘛！

文：Noelle So


更多打工仔分享，追蹤 ECjobsonline 專頁 或 瀏覽 www.ECjobsonline.com