​打工仔最頭痛嘅7件事


以為搵到份長工就可以一世無憂?呢個諗法實在太天真喇!打工有打工嘅難處,喺香港,要做個小小嘅打工仔,都唔係咁易,因為現實上會有好多難題打擊你、挑戰你!

1. 交稅
平時收到朋友寄嚟嘅信、postcard、聖誕卡固然開心,但如果係收到綠色信封喇喎……就真係唔方唔開心。因為,一年一度交稅嘅日子又到喇!咁辛苦打咗成年工,結果要嘔返咁多錢嘅糧出嚟,真係唔抵啊!可唔可以當冇收過張稅單?

2. 唔夠錢畀家用
今個月洗大咗,搞到自己唔夠錢用,要捱麵包過日子唔緊要!至怕係唔夠錢畀家用!屋企人發覺你畀少咗,又會喺度問長問短,以為你畀公司炒咗,或是經濟上有咩困難。以後出咗糧,都係即刻畀咗家用穩陣啲。

3. 公司裁員
平時做得好哋哋、有努力工作的話,其實都唔洗點擔心話會畀公司炒魷魚;最怕嘅係,你明明好畀心機做嘢,則因為公司要合伙或重整架構等原因而被裁。完全冇預備,冇先兆,冇知會,淨係賠返丁點錢畀你就叫你執包袱走人,無論你之前幾咁落力為公司都冇情講,只係睇吓係邊個咁唔好彩要畀公司犧牲。

4. 遇上豬一般的隊友
工作上有partner、可以減輕吓負擔固然係好事,但如果係遇到豬隊友、free rider、惡頂同事,有時真係情願自己一個做返。自己辛苦啲,做一份100分嘅good work,總好過成team人夾手夾腳,傾咗幾晚通宵之後,整咗份0分嘅垃圾出嚟。

5. 應酬
工作上少不免要出外應酬、見客,明明返工做嘢、跟同事打交道已經冇咗半條人命,仲要笑足成晚,懶social咁周圍同人打牙跤,簡直仲攰過OT!唯一鼓勵到打工仔出去應酬嘅甜頭,我諗就係食高級餐廳、開香檳,可以claim返公司錢掛!

6. 收到老細message
辛辛苦苦做好曬啲嘢,以為6點鐘可以準時走人,點知就喺5點59分先嚟收到電話/email話有份文件要改,搞到放工前一刻先嚟OT,原本仲已經安排好曬收工要去邊度wet。不過,臨收工先要你OT都叫有啲人性啊!最怕係放咗工、返咗屋企,甚至係放緊長假、去緊旅行散心嘅時候,都要急call你叫你趕份proposal出嚟!次次收到上司message都知冇好嘢,強烈建議立法,非上班時段打工仔毋須回覆上司訊息!

7. 公司電器故障
電器呢家嘢,真係好識揀時間嚟壞,電腦一定係喺趕文件嗰陣先嚟死機、上唔到網、黑mon,一係就printer jam紙、壞機,仲要次次call親維修部都要等成15分鐘先有人嚟整。不過,壞機都唔係最嚴重嘅事,問題係份文件未save架!
不得不讚賞一句,香港打工仔嘅生命力真係好強,工時已經夠長,又要成日OT,份糧又唔係高,要面對生活上咁多嘅挑戰同難題,仲可以喺職場度生存落嚟,實在佩服!

文:Noelle

更多打工仔分享,追蹤 ECjobsonline 專頁 或 瀏覽 www.ECjobsonline.com
標籤: 裁員  打工仔  畀家用  應酬  交稅  

留言


請按此登錄後留言。未成為會員? 立即註冊
    快捷鍵:←
    快捷鍵:→