​【打工仔煩惱】令人不解嘅office文化


人大左諗住出左黎社會工作就可以隨心所欲?其實又唔一定,事關打工仔都比好多慣性的辦公室文化綁住!令到大家覺得好頂唔順,完全唔明點解會存在啲咁無謂嘅規矩!

1. 女士要化妝
明明自己素顏個樣又唔係唔見得人,都唔明點解番工一定要化妝!日日化妝搞到啲皮膚差曬,化妝品又貴,仲要早啲起身打扮,真係少啲耐性同恆心都唔掂!其實我又唔係靠個樣搵食,化妝呢家野,可唔可以放緩下呢?不過,香港人好多都係外貌協會的會員,你唔化妝,喺人地心目中已經大打折扣,分分鐘仲會覺得你唔尊重人!遲下可能冇整過容都唔請你添啊!
2. 番工要着套裝
所謂的smart casual,其實都只不過係個籠統嘅說法,你咪又係要着套裝番工!特別係男士們,大熱天時都要着恤衫、長褲加西裝褸上陣,唔熱到傻就奇!其實outlook係咪真係咁緊要呢?除左見客、見工、見老闆,平時番工係咪可以casual啲呢?老實講句,我唔着套裝番工都可以好smart架!

3. 鬥遲放工
大佬,我已經做足9個鐘,想準時收工番屋企食餐飯姐,點解啲人要扮勤力、冇8點都唔肯放工走人呢?你地一個二個賴死唔走,搞到冇人敢走,想搏上位、搏上司賞識都唔洗搞着其他人掛?其實放工時間係公司訂嘅,一夠鐘員工當然可以理直氣壯咁離開,冇話邊個遲啲走就勤力啲嘅!其實你地咁晏都唔走,係咪未做曬啲野咋?唔好扮喎!

4. 名校生就一定叻啲
讀哈佛、牛津就一定勁啲?唔好咁多stereotype啦!出得黎做野,個個都係由低做起,冇話讀番書就一定人工高啲嘅。機會始終都係要靠自己爭取,向上司證明你的能力,總比同人比較學歷來得實際。上司都應該多從各方面作考慮,唔好因為學歷而有所偏頗。

5. 有人的地方就要有競爭
其實office係咪一定要搞分化、爭客仔、搞小圈子、分敵我、鬥黎鬥去呢?與同事就係咪一定唔可以發展友誼呢?難道大家就唔可以和平咁溝通合作和相處?同事之間其實都可以做朋友架姐!與其鬥餐死,不如努力工作、互相幫助,一齊為公司盡一份力啦!

6. 工作想如魚得水就要靠攏別人
想升職、攞着數,就一定要靠關係、要埋堆?呢個諗法有冇再out啲?你努力幾多,就有幾多回報,人之常情。做野從來都要靠實力,唔係靠攀附關係。

7. 升左職就要六親不認
有啲原本好friend、好傾得埋嘅同事,一升左職就反面唔認人,洗咪做到咁絕啊?其實做大粒嗰個都唔一定要擺個款出黎嚇人嘅,做上司都可以同啲同事打成一片,唔一定要下下扮惡。本身friend底嘅就更加唔洗咁避嫌嘅,有料就升到,我冇料嘅,24小時痴住你都唔會升到,唔洗下下都猜忌我想靠攏你喎。

8. 家訪
曾幾何時,有啲公司會搞家庭日,鼓勵啲同事帶埋屋企人參加,去BBQ、玩遊戲、大抽獎,大家順便互相認識一下。更癲嘅,甚至有老闆會去探訪員工的家人。而家仲當我係學生哥、玩家長日咩?大家都係打份工,唔洗查家宅啊嘛?

每個地方都有佢嘅慣性文化或潛規則,辦公室都唔例外。打工仔要成日受氣、開OT之外,仲要頂埋啲咁令人費解的辦公室文化,真係辛苦。不過,幾難頂都頂左咁耐,大家繼續爭氣,總有一日會有出頭天嘅!

文:Noelle


更多打工仔分享,追蹤 ECjobsonline 專頁 或 瀏覽 www.ECjobsonline.com

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→