【最怕入錯行】點揀適合自己的行業和工作

好多人都想搵份人工高、待遇福利好、老闆和同事又好nice的工作，不過高薪厚職係咪就一定啱你做呢？比你年薪五十萬，但份工做到踢曬腳，又唔係你在行嗰範，你又制唔制呢？其實想知自己適合咩行業同工作，一啲都唔難，問自己幾個問題就得啦！
1. 自己喜歡什麼？
鐘唔鐘意，好似係一個好個人又蠻橫的決定，但做任何工作，前題都應該係自己喜歡。唔鐘意的話，做耐左自然就會開始討厭番工、覺得壓力大 ; 相反，如果係自己喜歡的工作類型，人工低啲、做得辛苦啲，都會在所不計。如果每日都可以做自己喜歡的事，享受工作，甚至喻工作於娛樂，你就知道，份工啱你喇！

2. 自己的專長是什麼？
雖然話鐘意份工係好事，但喜歡與否唔係唯一一個必要條件，都要自己在行先得嘅！ 假如你喜歡IT行業，但係電腦白痴，對電子工程的知識冇掂過或者又唔叻，咁入左IT部門只會令到自己辛苦。如果你數口叻，對會計、金額投資唔抗拒嘅，不妨多作嘗試。至於唔知自己鐘意咩和自己的專長係咩的人，亦可做一些短期實驗，到不同行業體驗一下，都可以有助發掘自己的喜好和優點！
3. 自己的性格是如何？
唔好以為工作與個人性格冇太大關係，其實真係名副其實，你的性格如何，你的將來也必如何。如果你本身係一個文靜內向的人，咁一啲太social嘅公關、sales等行業好明顯就唔啱你，做落去可能只會感到吃力又唔習慣。不過，如果你性格開朗活潑，鐘意同人交流，不妨試下傳媒、教學等多面對人的工作，可能好啱你！

4. 在公司的發展空間大嗎？
如果你得以在公司中一展所長，唔需要有太多顧慮，可以有滿滿的大平台發揮自己的才能，咁份工一定非常適合你。始終僱員之間最開心嘅就係可以做到僱主放心、員工又做得開心，老闆信曬你，放手比你搞任何野，而你又可以盡情發揮，咁仲唔係100%適合兼雙贏！
5. 工作會為自己帶來成功感嗎？
做野最緊要就係做完有滿足感同成功感，你會為自己的工作而感到自豪同驕傲。如果做得好與唔好都覺得冇咩所謂，咩都唔care咁，好明顯你就對份工冇熱誠又冇興趣，長久落去只會越做越悶，睇嚟份工都係唔係好啱你喇！會為完成一項工作而感到高興，才是工作最大的樂趣和意義啊！

6. 公司能給你想要的東西嗎？
入職一間公司前，有冇諗過自己想得到啲咩，公司又可以比到啲咩你呢？如果你的目標係可以學到更多知識、擴闊眼界，而公司正正能令你更上一層樓，咁就真係perfect match喇！相反，如果公司的政策、辦公室文化等只會令你停滯不前，咁就唔多適合你喇！

與其搵份筍工，不如搵番份真正適合自己的工作啦！啱自己，先會做得開心，壓力自然細啲，人都精神啲啦！
💡更多關於打工仔日常分享及資訊，📱立即追蹤ECjobsonline專頁 或 💻瀏覽 www.ECjobsonline.com

文章來源:
https://www.ecjobsonline.com/news/2097/%E3%80%90%E6%9C%80%E6%80%95%E5%85%A5%E9%8C%AF%E8%A1%8C%E3%80%91%E9%BB%9E%E6%8F%80%E9%81%A9%E5%90%88%E8%87%AA%E5%B7%B1%E7%9A%84%E8%A1%8C%E6%A5%AD%E5%92%8C%E5%B7%A5%E4%BD%9C.html