【裸辭】裸辭前先問自己有無條件 精選 推薦

在香港地雖然搵食艱難，但依家人人都講夢想，好多人寧願窮，都唔想畀份工綁住一世，亦都有人好有骨氣咁炒老細魷魚、玩裸辭，然後拎曬成副身家去周遊列國，聽落好似好正咁，但其實要裸辭需要好大勇氣之外，仲需要以下5個條件。
1. 足夠儲蓄
辭咗職就一世無憂？坦白講辭咗職先有排你憂。冇咗份工，又假設你唔想做嘢住，咁即係有一年半載的時間係冇收入，自然就要動用你本身的儲蓄，換句話講，你夠錢洗先好學人講裸辭喇！否則唔夠一個月，可能你已經要打返幾份part-time要夠錢食兩餐。

2. 有信心好快能找到下一份工作
辭完職、抖一頭半個月，再加上搵工、見工的時間，最快可能都要成半年時間先會搵到下一份工，莫講話有啲人環遊完世界先再返嚟做嘢，當公司睇到你份CV有段工作空窗期，你又有冇信心對方會肯聘用你？甚至乎，你有冇足夠的工作經驗說服人哋請你？證明你係搶手貨？或是你有信心，想做返嘢嘅時候，就一定會即刻搵到工？冇信心嘅話，勸你都係收返埋封辭職信啦！
3. 人生目標
唔洗返工，試問你又諗住做咩呢？去進修？去旅行？去做義工？定係即刻去搵下一份工？想裸辭之前，勸你都係稍微停一停、諗一諗，自己辭咗職之後究竟想做咩？大概有個計劃，個人都安心啲啊！雖然好多人都話淨係想休息吓，但好多時反而就係因為冇嘢做，搞到個人囉囉攣，甚至搵唔到自己的價值和崗位。所以，set好目標真係好緊要架！

4. 有心理準備與社會脫節
雖然你可能淨係諗住抖一排就出返嚟做嘢，但時代每日都喺度更新，可能就喺你辭咗職之後，就有一啲新技術、新知識出現，而你miss咗，或者就係咁冇咗競爭力都唔一定，始終離開咗職場，好容易就會畀其他人追上。

5. 裸辭對你的人生有幫助好多人選擇裸辭，一係就係因為想休息吓；一係就係對工作感到不滿，唔想再做落去，無論係邊種原因都好，只要你確定辭職係一個啱嘅決定，並對你往後的人生是有利的，咁就不妨去馬，但如果你裸辭只不過係一時衝動，咁其實你根本就未做好準備，之後或者會後悔都不一定。

雖然話就話係裸，但裸辭其實都係需要一啲條件和準備嘅，沒具備以上5個條件的話，你都係專心做返個安安份份嘅打工仔吧啦！

文：Noelle

更多打工仔分享，追蹤 ECjobsonline 專頁 或 瀏覽 www.ECjobsonline.com