見工失言或出錯 該如何補救？

見工咁大件事，會緊張到語無倫次都好正常，但一個唔覺意講錯嘢，可能就係咁無咗個機會。其實又唔洗咁絕望嘅，人人都犯過錯，最重要就係識補鑊，依家醒你6個補救方法，教你點樣喺不同情況下執生，下次如果真係咁唔好彩，見工嗰陣失言、出錯，起碼都識打圓場，衰都衰得無咁核突啊嘛！
「粗口」而出
好多人講到興起，可能唔小心爆咗粗自己都唔為意，到收斂返嗰陣已經太遲，但係都千祈唔好側側膊扮咩事都無發生，逃避責任係打工仔嘅大忌，最好都係同對方say返個sorry，表示自己啱啱講到一時興起，口不擇言，可能講咗啲令大家覺得唔舒服嘅嘢，唔好意思，對方見你勇於承認錯失，願意承擔返責任，可能仲會加你分添！

帶漏文件
見工要帶咁多文件，會帶漏都係人之常情，但都咁大個人，拎漏嘢真係唔抵幫架喇！唯有早啲同HR講你唔記得咗帶邊份document，問佢可唔可以後補，千祈唔好等人問到你先同佢講你無帶，早啲出聲，早啲解決，對雙方都好。
遲到
遲到係見工嘅第一大忌，但相信大家遲到自己都唔想，你唯一可以做嘅，就係誠心誠意咁道歉，唔好諸多藉口，遲到就係遲到，例如你可以話：對唔住，我知道見工咁重要係唔應該遲到，但中途發生咗一啲事，我已經盡趕過嚟，希望你可以畀多次機會我，加埋個90度鞠躬，睇吓對方會唔會畀你打動到喇！

錯過面試電話
依家人人都慣咗用WhatsApp，有電話打入嚟，通常都覺得係廣告；或是出面好嘈，聽唔到電話，就係咁miss咗個面試電話，miss咗其實真係唔緊要，打返返去問係咪有人搵過自己，miss咗電話唔好意思，重新安排過個interview就OK！

無任何問題要問
面試最後一個環節，通常都係問你有無問題想問，但唔係人人都做到腦筋急轉彎，無prepare嘅話，有時真係會唔知可以問咩，但無嘢問嘅話，面試官可能會覺得你對佢哋公司其實都無咩好奇心或興趣。所以，就算你當下真係無嘢想問，都要記得補返句：我諗我需要啲時間消化吓，介唔介意我之後再透過email請教你？咁答可以表現出你強烈嘅自我意識之餘，仲可以透過email同公司有後續嘅聯絡，前提係記得問啲有深度啲嘅問題，唔好嘥咗呢個表現自己嘅大好機會啊！
講錯公司background
大家去見工之前，都會習慣做定research，了解多啲間公司，但網上存有好多錯誤或唔update嘅資訊，導致你見工嗰陣噏錯公司背景，累到你畀面試官兜口兜面指正出曬糗，但糗還糗，記得都要盡量表明返自己有做功課，例如提及吓最近有關公司嘅一啲新聞、消息或發展，實行有殺錯無放過！

犯錯並不可怕，最重要係識得認錯，並從錯誤中學習，鼓起勇氣去作出補救，咁就算錯，都錯得有價值啊！

💡更多關於打工仔日常分享及資訊，📱立即追蹤ECjobsonline專頁 或 💻瀏覽 www.ECjobsonline.com

文章來源:https://www.ecjobsonline.com/news/3046/%E8%A6%8B%E5%B7%A5%E5%A4%B1%E8%A8%80%E6%88%96%E5%87%BA%E9%8C%AF--%E8%A9%B2%E5%A6%82%E4%BD%95%E8%A3%9C%E6%95%91%EF%BC%9F.html