話題 ​飲食少啲糖可提升記憶力?7個減少糖份的好處

香港人依家食咩都講求健康,無論係自己煮定係出街食飯,都要少油、少鹽、少糖,keep緊fit就更加要戒糖,但攝取少啲糖份除咗健康啲、有助減肥之外,仲有咩好處呢?你知啦!甜品係女士們嘅最愛,唔sell多幾個食少啲糖嘅好處畀佢哋聽,係說服唔到佢哋架!

1. 增強記憶力
覺得自己記性差咗?可能就係因為你食得太多甜嘢!非天然嘅糖份會傷害腦部細胞,其會損害認知功能,導致記憶力衰退,攝取過多糖份更會提高患柏金遜症、抑鬱症和躁鬱症等疾病嘅風險。因此,甜嘢雖然好好味、好吸引,但都要適可而止,唔好拎自己身體嚟較飛啊!

2. 改善皮膚問題
攝取過多糖份會導致體內激素分泌失常,令皮膚容易出油、乾燥、過敏,甚至出現濕疹等問題。所以,塊面成日生痘痘,未必關天氣事,亦未必係因為你食得太熱氣或皮膚太差,可能只係你吸取得太多糖份。美國營養飲食協會期刊嘅一份報告指出,高糖份飲食與生痘痘有密切嘅關係。可能戒咗糖,你嘅皮膚問題就可以即刻得到改善!到時咩cream都唔洗再搽喇!

3. 身形更苗條
加工糖含有高卡路里和高脂肪,唔單止不能為我哋帶來飽足感,仲會一個唔小心就愈食愈多,認真邪惡!戒糖後,你嘅身體就唔需要再處理呢啲額外嘅熱量,唔會容易覺得肚餓,管理體重就更有效!

4. 更有活力
做嘢做到恰曬眼瞓?好多人都會飲返啲能量飲品、可樂或咖啡嚟提提神, 但糖正正就係阻礙我哋身體儲存能量嘅元兇!個人分分鐘愈飲愈攰!一到下午就放蚊?不如試吓戒糖啦!建立無糖嘅生活習慣,個人反而更有活力 啊!

5. 提高睡眠質素
糖份會影響血糖,高血糖會導致腦波活躍,其會影響睡眠狀況。近排瞓覺都瞓得唔好?成日發夢?由今日開始飲食少啲糖,或者可以幫到你,以後就有覺好瞓啦!
6. 踢走憂鬱心情
啲人成日都話唔開心就食啲甜嘢啦!食完就會開心返架喇!簡直就係大錯特錯!攝取過多嘅糖份不但唔會令人開心,反而會增加罹患抑鬱症嘅風險,甚至可能會影響腦部對於壓力的應對,加重抑鬱和焦慮的情況。而且,當身體攝取糖份時,血糖會快速下降;糖份得以消化後,血糖又會再度上升,呢種起伏會令情緒變得波動,使我哋容易動怒和緊張,仲會心郁郁好想繼續食甜嘢。因此,節制地攝取糖份,心情先會平復和穩定架!

7. 降低患癌/糖尿病風險,心臟更健康
糖會影響胰島素嘅運作,係心血管疾病和糖尿病嘅一大元兇!長期食用額外添加糖份嘅食品,亦會導致血壓和心率不正常。另外,有科學研究發現,血液中有57%的糖份會被癌細胞所消耗和吸收,食得多糖即間接為癌細胞提供更多嘅養份,增加患癌嘅機會!聽到都覺得驚呢?咁就由今日開始食少啲糖啦!

任何嘢食得太多或太少都係唔好嘅,最重要就係識得節制,少食多滋味嘛!食少啲糖仲可以降低壞嘅膽固醇和提升心臟健康,何樂而不為呢?

文:Noelle

更多打工仔分享,追蹤 ECjobsonline 專頁 或 瀏覽 www.ecjobsonline.com

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→