【29+1】踏入30歲要做嘅8件事


人人都話要趁後生,幾歲幾歲之前要完成啲咩壯舉,先對得住自己的青春!但青春、熱血過後,前面又有啲咩等住我們去做呢?踏入30歲,再不是什麼十八廿二,8、90後都已經唔再是年青的一輩,而30歲所代表的是一個怎樣的人生呢?

1. 檢視工作生涯
廿幾歲人就話好有上進心、要好好幹一番事業,但成30歲人,理應是追求較安穩的工作和生活。如果你覺得自己在公司不被看重、冇咩晉升的機會,又要成日OT,甚至乎連公司內部的營運都立立亂的話,真係要考慮一下轉份工作時間較穩定、薪水較高的工作,公司的重用和晉升機會亦同樣重要!

2. 多了解自己的財政狀況
後生仔就話可以無後顧之憂咁花天酒地,幾窮途末路都有屋企人back up你,但30歲就唔應該繼續做「月光族」。花多啲時間了解下金融財務的知識,甚至學下點投資,儲定啲錢將來買樓、買車、成家立室都好啊!

3. 凡事量力而為
年青的時候總係持住自己青春大曬,咩都唔理後果,但踏入30歲就要學識對自己同關心自己的人負責任。咩笨豬跳、跳樓機、水上激流、一個人去鳳凰山睇日出、同friend去酒吧隊酒等等,明知自己唔得就唔好勉強喇 !

4. 注意自己的健康
後生嗰時有quota可以大吃特喝、捱夜,30歲人就應該學識照顧自己的身體,定期做身體檢查之餘,仲記得要忍下口、早睡早起喇!

5. 謹慎作人生重要決定
30歲人理應變得成熟穩重,下決定時就唔應該三心兩意,屋企人亦都唔能夠繼續幫你揸主意,幾時結婚、要唔要小朋友、轉唔轉工、移唔移民、投資咩隻股、幾時買樓等等,都要自己話事架喇!凡事猶豫不決,只係浪費時間!

6. 花多點時間陪伴家人
後生的時候,我們總是花好多時間約朋友出街、去wet、同另一半去拍拖睇戲食飯,或者只顧住追求事業上的成就,忽略左屋企人,但我地隨住時間踏入30歲的同時,屋企人亦都一日比一日老,唔想後悔的話,抽多啲時間陪佢地周圍行下、飲下茶啦 !

7. 凡事睇開啲
年少的時候,每當我地遇到少少唔順心的事,就會即刻破口大鬧,有嗰句講句話,為左小小野搞到條氣唔順左一個星期,但踏入30歲就會知道,好多野其實唔需要睇得咁重要 : 工作上有些少阻滯,咪做番好佢囉 ; 比人得罪,又唔需要咁耿耿於懷,凡事睇開啲,自然都活得開心啲。

8. 建立自己的專長
邊個話到左30歲就唔可以參加興趣班?為興趣又好,為自我增值又好,嘗試走出工作以外的世界,學下呢樣學下嗰樣,當擴闊一下眼界的同時,學到咁上下甚至可以培養成自己的專長,學多門手藝添!等自己工作以外都有啲精神寄託啊嘛!

每走到人生的一個新的階段,總會迎來一啲新的煩惱,同新的體會。你又準備好迎接30歲未呢?抑或過左30歲的你,又完成左你的to-do list未呢?

文:Noelle

更多打工仔分享,追蹤 ECjobsonline 專頁 或 瀏覽 www.ECjobsonline.com

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→