【時日太快】6大踏入25歲的特徵 你中幾多個? 精選 推薦

自從讀書畢業出嚟做嘢之後，時間就好似禁左fast forward制咁樣過得好快好快，眨下眼咁就25歲！殘忍啲講句，真係照下鏡都發現自己老咗好多！其實除左外表，生、心理同行為上，25歲嘅我地，都開始出現唔少年老的特徵！
1. 捱唔到夜
通宵唱K？除夕夜去蘭桂坊倒數？同friend打通宵麻雀、打通宵機？如果你嘅答案係 : 「唔好搞我喇！」咁你已經開始有邁向年老的特徵！以前就算幾早起身，夜晚都可以係咁煲劇、上網、打機，越夜越精神！而家？一過12點就眼訓，你叫我出去蒲、去玩，夜啲訓已經係一種折磨！補幾多日眠都唔夠！

2. 突然注意飲食
後生的時候總係邊樣最唔健康就食邊樣，冬天幾凍都要飲凍野，放題、自助餐、韓燒任食？好閒啦！差不多個個星期都食一次。但過左25歲的你，係咪已經唔再對美食感興趣呢 ? 而家的你，只想食得清淡啲、有營養啲，夏天都要叫番杯熱檸水幫助消化，咩任食火鍋都已經冇咁多quota食，仲唔係因為個人開始老？
3. 去玩去wet high唔起
以前去親主題樂園都會玩曬咁多個game ; 去睇演唱會總係會跳足、唱足3個幾鐘 ; 就連去旅行都會把握一分一秒玩盡佢！但呢啲咁熱血的行為，對過左25歲的大家而言，已經成為回憶的一部份。而家連主題樂園都唔想去，廢是同人逼 ; 演唱會 ? 我都係坐低拍下手、fing下螢光棒算喇！至於去旅行，跟團好似舒服啲啵！會咁諗的人，只能講一句，少年你已經不年輕了。

4. 知慳識儉
如果你開始變得精打細算、咩都計到盡、用到盡、變得吝嗇、唔太捨得買野比自己、對於儲到一舊錢好有成功感，甚至會留意近期超市、藥妝店換緊咩寢室用品和砂煲罌罉、買親野都會好小心咁收好啲印花等等，咁恭喜你喇！你唔單止為你頭家慳左好多錢，仲老成左好多添！在不久的將來，相信你一定可以成為一名成功的職業師奶！
5. 皮膚變差
25歲之後，皮膚曾經幾白幾滑，都敵唔過歲月的摧殘，剝殼雞蛋，都會開始變得暗啞泛黃，每次素顏都差啲認唔到自己！殘到咁真係唔化妝唔出得街！真係唔怪得女士們要成日買新護膚品同化妝品啦！唔趁25歲keep好啲，30歲就後悔架喇！

6. 體力下降
無論年輕的時候參加過啲咩校隊、區隊，25歲的你，都肯定已經keep唔到當年的體質和線條。操得幾行都好，體力下降左就係下降左，以前15分鐘可以跑成30個籃球場，而家跑兩個圈都喘曬大氣，真係唔認老都唔得！對於有小朋友的人嚟講，睇住啲細路跳跳紮一日冇停過，應該好明白年老的滋味。

步入年老的人生必經的階段，其實面對體力、飲食或者記憶的問題，又何必咁介懷呢 ？人最重要就係活得開心、有目標，何況25歲都唔係好老姐！仲有大把時間享受人生！
文：Noelle


更多打工仔分享，追蹤 ECjobsonline 專頁 或 瀏覽 www.ECjobsonline.com