出到嚟社會做野，好多打工仔都會覺得返工佔左人生好多時間，辛苦但冇咩意義。其實凡事都有佢嘅苦與樂，有人嫌返工悶，亦都有人好享受返工。要在一成不變的工作環境中尋找快樂？其實一啲都唔難啊！
1. 建立志同道合的圈子
以前返學總有幾個死黨由朝到晚都同你一齊玩、一齊傾計、一齊做傻事。出到嚟做野，如果可以與同事打好啲關係，搵到志同道合的工作伙伴，公事上可以事半功倍之外，工作環境的氣氛都會相對變得輕鬆同熱鬧。大家熟絡左之後，同事分分鐘仲可以成為你傾吐心聲煩惱的對象，好似好朋友一樣咁親暱。所以話，有好的同事圈真係會推動到你返工架！
2. 樂於幫助別人
所謂「助人為快樂之本」、「施比受更為有福」，在工作上，如果可以運用自己的專長，為其他同事提供協助，對方會覺得感激之餘，你亦會獲得一種工作以外的樂趣和喜悅。幫助別人的同時，仲可以與同事有多啲嘅互動同交流，建立彼此的關係，一舉兩得！
3. 從工作中取得滿足感和成就感
每次完成一份proposal或者大project，從中得到的滿足感和成就感對日後的工作可是十分重要的。你用時間和心血換來好成績，當中的成就感正正就是工作中快樂和推動力的來源。你用咩心態看待你的工作，換來的成果係成正比。所以，認真工作的人總是比hea做的人快樂啊！
4. 發揮所長
每個人都有佢擅長的地方，如果能將優勢運用在工作上，公司亦有空間比你發揮所長，咁就絕對能夠提升你的工作興趣和自豪感，返工自然都開心啲！所以，搵一份自己有興趣的工作好緊要架！
5. 凡事保持樂觀的心態
點解咁多人討厭返工？其中一個主要原因可能就係佢地凡事都抱怨、咩都諗向唔好嘅嗰一面 : 咁多野做，今晚實要OT啦、佢咁鬼擦鞋，實升佢職啦、又要開會，成日講埋啲無聊野。但其實每件事都有兩面，好多時我地覺得返工好辛苦，可能只係比我地自己的負面心態所影響。如果調番轉頭諗，快啲做完可以早啲收工，要努力啲至得 ; 佢升到職，可能真係因為有啲料到，要向佢學習下 ; 今日開會可能又係講啲冇用的內容，但係都打醒十二分精神聽下有冇重要野講先，咁係咪會正面啲呢？
生活唔係只有返工，但返工就係生活的一部份。與其日日苦瓜乾咁做野，不如試下尋找工作中嘅一啲小趣味，令工作變成一件開心的事！
文：Noelle
請按此登錄後留言。未成為會員? 立即註冊