【打工仔眾生相】一餐飯了解同事性格


新人一入到公司大把野要適應,新工作內容、新公司文化、新環境等等,仲有,要重新適應一班新同事!你可能會話,個個都唔同性格,邊個玩得、邊個唔激得、邊個最難合作,真係唔係一朝一夕就摸索得到!要摸清楚各同事的性格,等將來冇咁容易有嗌霎,其實一餐飯的時間就夠啦!

1. 隨和易話為
成班同事一齊食飯,最怕就係要就各人的口味 : A唔食海鮮 ; B又怕辣 ; C就戎食牛,真係辛苦曬叫餸嗰個喇!所以如果有啲隨和又好話圍的人出嚟講句 : 「我冇所謂啊!我咩都食嘅!」,就真係猶如救星一樣!順得人意又唔會諸多要求,工作上合作應該都一樣咁nice啦!

2. 精打細算計到盡
每次埋單要除數都好頭痕,不過同事間總有個人會主動幫大家計好條數,不過佢咁做未必係出自好心,可能只係唔想蝕底咋!咁精打細算嘅人,工作上都一定好有效率之餘又唔會做多左野,請佢幫忙佢都可能要諗過度過,對自己有利先會應承你!

3. 挑剔難溝通
一班人叫餸食飯,總有啲人懶係冇所謂但又諸多要求 : 明明話咩都食,但你話嗌椒鹽鮮魷嗰陣佢又話太肥又高膽固醇 ; 你叫燒味佢又話今日啲燒味唔靚 ; 你想叫個菜煲佢又話食菜唔抵。Well,我諗你都想像到佢喺公司嘅為人會係點啦 : 你話一佢又話二,ban曬大家啲idea,合作上應該會幾頭痛。

4. 潔癖無極限
一坐低就幫大家洗餐具、千叮萬囑叫大家用公筷、不時要消毒雙手、食完仲要去漱口先至肯走,呢啲潔癖達人,喺公司的徵狀一定會更加顯著,大家要小心唔好踩中地雷喇!

5. 是非精
食飯時間係同事間講是非的最佳時機,有啲人總係可以好似交換情報咁雞啄唔斷、由一個部門講到去另一間公司的是非。遇着啲咁嘅同事,最重要都係自保,求神拜佛自己唔會得罪到對方啦!

6. 用盡每一分資源
每次食飯有野食唔曬時,總會有人一早帶埋個食物盒拎走佢幫大家盡環保之力,咁識從源頭減廢的同事,相信對公司所提供的資源亦同樣唔會浪費,屋企的釘書機、A4紙、萬字夾等等,應該都係嚟自公司的文具部。

以後大家出去食飯唔好再掛住玩手機喇!不妨留意下你身邊同事的習慣,參透下佢地的性格,嚟個食飯睇相game啦!

文:Noelle

更多打工仔分享,追蹤 ECjobsonline 專頁 或 瀏覽 www.ECjobsonline.com

留言


請按此登錄後留言。未成為會員? 立即註冊
    快捷鍵:←
    快捷鍵:→