近排大台熱播緊嘅〈心理追兇Mind Hunter〉，講到飾演心理學家嘅馬國明為左幫死左嘅女朋友尋找真相，不惜一切去調查涉事的可疑人物王君馨，冇野做嗰陣又會幫飾演警察嘅敖嘉年去查下案，甚至去埋肇事地點幫手調查，認真得閒！其實現實中嘅心理學家，係咪真係咁多時間，接見client之餘，仲可以撈埋警察嗰份？馬明全職做心理學家，兼職做警察，咁敖嘉年咪即係冇做過野？
其實睇番警方嘅網頁，警務人員查案係真係會搵心理學家幫忙，佢地亦都有個專稱比佢地，叫做警察臨床心理學家，但係佢地嘅工作範圍就同電視劇做嘅好唔同喇！
喺〈心理追兇Mind Hunter〉裡面，馬明會同警察一齊去兇案現場觀察、搵證據，又會從唔同嘅蛛絲馬跡同疑犯嘅口供，去推斷兇手嘅人格、精神同心理狀況，估計下一個受害者係邊個，以及引導警方應該點樣搵出真兇。
現實之中，雖然警察臨床心理學家可以從兇手在案發現場的表現去推斷他/她的為人，不過，得知佢嘅心理概況，其實都只係可以令到警方對疑犯有更深入嘅了解。而警察臨床心理學家亦只能運用手上的有限資料，例如案情簡要、罪案現場的相片、地圖、受害人和證人的口供跟錄影口供，以及根據個人經驗和犯罪心理學的知識去作出推論、比建議警方。
不過，想好似警察臨床心理學家咁威威，每月賺4萬至8萬蚊人工，都要有番個臨床心理學碩士學位先得！A level的中、英文成績亦最少要有個C (大概為會考嘅B或DSE嘅level 5*) ; 報考IELTS的話，總分要有6.5或以上，各項卷目的分數亦不能低於6，考到高分而又想入職的朋友要記住IELTS成績只有兩年有效期。另外，所有公務員都要考核《基本法》知識，不過申請人在基本法測試中的表現只係其中一個考慮因素，唔會影響其申請公務員職位的資格。講到尾，都係學歷、經驗和才能最重要。可惜相關職位暫時未有公開招聘，合資格而又有興趣嘅朋友，怕且要等下喇！
電視劇嘅情節同人物有時可能會誇張左，令大家產生誤會，以為警察會帶埋心理學家出去查案。睇完呢篇文章，希望大家會了解多啲警務人員同警察臨床心理學家之間嘅關係啦！多得佢地攜手合作，先可以迅速破案、逮捕兇手，保障廣大市民的安全！
文：Noelle
更多打工仔分享，追蹤 ECjobsonline 專頁 或 瀏覽 www.ECjobsonline.com
請按此登錄後留言。未成為會員? 立即註冊