中年轉工要知的3件事

邊個話人到中年唔好轉工？無論你係想轉工還是「被轉工」，以下呢3樣嘢要記住，咁就唔會難到你。
1、行「成熟」路線
年齡歧視？話冇，你都唔會信。不過，對於4字頭的你，暫時仲可以放心啲啲，事關專家話呢個問題係4字頭未算嚴重，事關依家啲人40歲其實同以前啲30歲差唔多。

見工嗰陣，就算對方後生自己十年都唔好自亂陣腳。記住，「成熟」唔係負累，而係你嘅資產，所以要行「成熟」路線，Sell自己見過幾多世面、人脈有幾廣、知識有幾專門。仲有，記住40歲轉工轉行嘅一定唔止你一個。

2、整定網上個人專頁畀人睇
好多公司都會上網起應徵者底，睇你私下係個咩人，有冇過人之處或唔見得光嘅嘢。網上嘅你好可能係間公司對你嘅第一印象，未必要等到Interview。
既然佢哋想睇，大方啲，畀佢睇！不過，記住要執番妥當啲嘢，最好係嗰類以工作為重點嘅社交網站，Update下你同工作有關嘅事，Show下自己啲工作能力。

又或者再Pro啲，直頭整個個人網站。呢個年代要整網頁唔使一定係IT出身，網上大把平台有預設版面幫你整好，申請完就用得，仲要免費添，方便快捷。

3、要有軟技能
專業知識固然要有，仲有樣好值錢嘅，就係「軟技能」。「軟技能」者，「Soft Skills」也，即是溝通技巧、團體合作、受人歡迎、值得信賴同尊重呢類。唔好睇少，有齊呢啲先係一個出色嘅員工。

年輕時就話鬥學歷鬥出身，社會上打滾咗咁多年嘅你，處事圓滑、團體合作點難得到你。
最後提多句，專家話轉工轉行前，有個問題一定要先知答案，就係「嚟緊呢一年、兩年、三年究竟自己做到啲乜先最滿足？」呢句，無論你係廿幾定四十幾，都一定要問清楚自己。