最常見的職場歧視 精選

最常見的職場歧視
刊登日期: 2017-09-06


雖然社會而家成日都話人人平等，鼓吹每個人的權利和待遇都係一樣，但計我話，有人的地方就會有競爭，有是非，有歧視，職場更是如此：不論你學歷有幾高、有幾多工作經驗、做嘢有幾叻，始終都係避免唔到性別、身份等因素所帶來嘅歧視問題。

1. 性別歧視
話就話兩性地位已漸趨平起平坐，而家職場都多咗好多女高層，證明女性的工作能力一啲都唔遜色於男性。不過，做女仔點都係會比人睇低一線，唔係今時今日點會仲有咁多職場性騷擾的個案發生？另外，面對女同事懷孕，好多上司仲會嫌對方成日請假好麻煩，一啲都唔識得體諒。在這個如此進步摩登的社會，性別歧視的問題依然存在，其實都幾諷刺。
2. 年齡歧視
職場就係咁唔fair：你後生啲會畀人睇小，覺得你仲係小朋友唔做得嘢；你年紀大啲又畀人嫌你老、手腳慢，跟唔上潮流。其實將心比心，你有朝一日都會變老、被社會淘汰，點解唔可以畀個機會對方呢？何況人地經驗一定多過你，話唔定喺佢身上會學到更多嘢呢！同樣，你以前都係由0開始，從一個社會新鮮人一步步走上嚟。畀個機會後生仔，話唔定會青出於藍呢！

3. 容貌歧視
口講就話睇人地嘅內在美和工作能力，但試問有邊個唔係外貌協會嘅會員呢？一個着短裙仔、化曬妝嘅靚女，同一個着套裝、相貌普通、戴眼鏡嘅女仔去見工，面試官好多時都會因為印象分和個人偏好而揀請個靚女；同一道理，靚仔、靚女出嚟做嘢，搵工和工作硬係順利啲、待遇好啲、客人多啲，又特別受同事歡迎咁。其實個樣係點就天生嘅，靚就一定好啲？而醜就係一種罪？
4. 地區歧視
住得遠都錯？唔係啊嘛？冇錯！有啲上司就係咁不近人情！你每日由天水圍番太古，就算係打風、落雨的日子，遲咗10分鐘都係遲，冇情講！8號風球怕冇車話想早啲走？有啲老細仲會即刻比面色你睇，塊面黑到你都唔敢走！大佬啊！住得遠我都唔想架！我每朝天未光就要起身，而家打風畀我早半個鐘走係咪都唔得先？

5. 種族、性傾向、更生人士和殘疾等歧視
呢幾樣歧視問題不但在職場，在社會都是非常普遍。種族方面，你會唔會因為對方係黑人、菲印籍或南亞裔人士就唔想僱用佢地？在性別傾向上，若有同性戀者、雙性戀者、變性人或雙性人來見工，你會唔會有所顧慮？另一方面，如果你知道對方有案底紀錄，會唔會已經唔想請佢？最後，殘疾人士來應徵，你又會唔會嫌棄對方呢？其實呢個世界冇人係完美，你請人番嚟係做嘢，工作能力自然先係首要條件，而非對方的種族、性傾向或身體概況。
即使現今社會已經開放咗好多，歧視問題卻仍活生生的存在喺你和我的身邊。我地不斷追求一個和諧而平等的家園，則一直自打嘴巴地製造歧視。其實人人都係生而平等，我地應該做的不是濫發標籤，而是接受別人的不一樣，發掘他人的優點，咁樣世界先會更加美好，唔會再有歧視問題。

文：Noelle


更多打工仔分享，追蹤 ECjobsonline 專頁 或 瀏覽 www.ECjobsonline.com