影響上司印象的五個壞表現 精選 推薦

影響上司印象的五個壞表現
刊登日期: 2017-09-22


唔想俾上司鬧？唔想令上司反感？唔想影響上司對自己嘅印象？以下五個壞表現你一定要知。

1. 經常遲到
守時反映對事嘅重視，係基本要做到嘅嘢。連基本嘢都做唔到，唔係上司都火滾啦！時間就係金錢，如果一個遲十分鐘，第二個又要遲多十分鐘，咁就冇咗二十分鐘。本來可以喺預定時間內完成到嘅嘢都拖到唔知幾耐先做到。假若見客遲到嘅話仲大劑！咁樣唔只得罪個客，上司仲會覺得你冇譜添！

2. 經常請假
有病或者屋企有好嚴重嘅事發生要請假都可以體諒，不過三日唔埋兩日就請假，真係好乞人憎。你放假嗰陣都唔會掂個project，翻到公司又要適應翻一排先有翻工作mode。做吓又停吓，翻吓又放吓，成個project又俾你拖慢曬。
3. 粗心大意
雖然你唔想粗心大意，但係因為咁而帶嚟嘅負面影響，真係搞到上司都唔想睬你。工作最重要係上心同做到最好，做完一份文件再double check吓，點都唔會有大錯。如果因為一次粗心大意影響咗個結果，上司下次就未必再對你委以重任㗎喇！

4. 不主動積極
同事有咩事，去幫！自己有咩唔識，去問！就咁坐喺到，上司會覺得你冇上進心，唔係認真投入工作。試問有邊個上司鍾意呢啲下屬？

5. 口沒遮攔
粗口、壞話、毒咒全部都要走、走、走！如果成日都唔收口，亂咁講嘢，真係得罪人㗎。仲有萬一唔小心講咗啲上司唔啱聽嘅話，未來嘅日子真係有排受。
唔想惹上司討厭，就千萬唔好做上述任何一樣嘢喇！

文：小C

更多打工仔分享，追蹤 ECjobsonline 專頁 或 瀏覽 www.ECjobsonline.com