​8大壞習慣令你面試扣分

​8大壞習慣令你面試扣分
刊登日期: 2017-06-15


每一份工作都是得來不易，從搵工、做research、見工到錄取，都唔知用左幾多時間，好多時仲要未必有interview，比人reject左，又要花時間從頭嚟過。不過有時冇公司請，唔一定係你的學歷唔夠，或者經驗不足，可能只係你喺面試中無意地做左一啲令人大扣分數的壞習慣，快啲睇下呢啲習慣有冇你份！

1. 遲到
無論係約人、番工定見工，準時勤到都是基本的禮貌。見工都可以遲到，證明你根本就冇做足準備，亦都冇心裝載，請你番嚟做野仲得了嘅？為了唔想遲到，早一個鐘到就實冇死喇掛？其實太早到都唔一定係好，你咁早去報到只會造成對方的不便，同時都唔尊重對方。所以，最理想都係早15至20分鐘到達現場，去到可以觀察下間公司、去個洗手間、冷靜下，時間就啱啱好喇！
2. 冇食早餐就去面試
早餐係一日三餐裡面最重要的一餐，幾冇胃口都好，都要為身體補充一下糖份，咁面試時先會專心到、好好發揮，你都唔想面試嗰陣恰眼訓、唔夠精神架！

3. 冇做功課
見工前，為了表示你的誠意，點都要做啲research，了解下間公司的運作，對答時先有機會拋書包架嘛！如果你連你面試公司的背景、員工的工作內容、對行業的諗法和建議都一無所知，咁你讀幾多個博士學位番嚟都冇人會請你啦！

4. 等面試時喺度玩手機
而家啲人成日都手機不離手，連等面試嗰時都唔捨得放低。其實在等面試嘅時候，你應該做嘅事唔係轉珠、捉精靈、覆whatsapp，而係複習下筆記或者公司資料，再唔係就坐定定準備下面試的心情，入到面試室就可以即刻ready好啦！
5. 一抽二褦去面試
平時打工仔番工成日都一抽二褦，着曬西裝都要左手一個公事包，右手一杯咖啡，要高貴，但又好論盡，去面試就唔好拎咁多野喇！去面試最重要就係簡單整潔，準備好電話、銀包和面試的資料就夠架喇！再唔係就帶定枝水，女士們就帶定個化裝袋以備不時之需，乜都夠曬啦！

6. 小動作多多
好多人緊張時都會無意中做出好多小動作 : 眼神游離、抖腳、前後搖擺、咬手指等等，即使係情不自禁，呢啲小動作都會令你的表現扣曬分。其實面試最緊要就係表現得輕鬆自然，你越緊張就越多小動作。所以建議大家可以先行喺屋企對住塊鏡練習下，觀察下自己會唔會有咩壞習慣，到真正面試嗰時就可以表現得更好啦！
7. 講前公司嘅不是
面試時，應徵者少不免會被問到「點解會離開前公司」這個問題，不過，就算你真係受到前公司的刻薄，你都唔能夠坦白向面試官抱怨，甚至數盡前公司的種種不是，咁樣只會顯得你唔捱得苦、抗壓力低、人際關係差。所以，遇着呢類問題，都係正面啲回答好！例如稱自己想轉下工作環境、增值自己等等，咁答僱主先會覺得你係一個積極、對人生有計劃的員工。

8. 胡亂插嘴
應徵者當然會想在面試時盡力表現和突出自己，但太過進取、在其他人講緊野嘅時候加把嘴，只會顯得你唔識尊重自己，又唔尊重他人的發言，咁冇判斷力和耐性的人，應該都冇乜僱主會肯請。

CV、經驗對於搵工固然重要，不過請唔請你，最主要都係取決於你面試的表現。所以，所有影響你面試分數的壞習慣一定要統統改掉啊！無謂喺工作能力以外的項目上失分啊！
文：Noelle

更多打工仔分享，追蹤 ECjobsonline 專頁 或 瀏覽 www.ECjobsonline.com