上位成功必備三要

上位成功必備三要
刊登日期: 2017-11-02



作為一個有上進心嘅打工仔，希望得到嘅唔係穩定嘅工作，而係有挑戰性同可以特破嘅機會，努力向上。想上位話難唔難，話易唔易，但就一定要有以下三樣條件。

1. 人脈
「出外靠朋友」人際網絡永遠係好幫手。如果有一個晉升機會，通常都係益咗識得嘅你先。因為起碼對方知你性格，熟你處事手法，工作上嚟都會自在啲。當然，要有好嘅人脈要先跳出自己嘅圈子，主動結識唔同類型嘅人。預著有人講其他人壞話真係得個聽字好，唔好亂咁加把口，否則會不知不覺咁得罪人。對方有事時自己又有能力幫嘅就唔好怕蝕底，幫吓對方。你對人好，人哋會記住。即使對方未必一下子回報到你，但積埋積埋愈來愈多貴人，職場路就會好走得多！
2. 能力
有貴人相助都要自己有實力先上到位。有能力，人哋先敢放手俾你做，同事先會信服你。要提升自己能力，首先要知道自己有咩優點同缺點。俾心機表現自己最好嘅一面，發揮優點；誠實面對自己缺點，揾方法法作出改善。如果有嘢唔識，唔好請強，亦要謙虛請教人。任何一個工作機會或者細節都要盡力做好，唔好得過且過。因為一件小事，都可以知道你嘅責任心同實力去到邊。以上種種係增強自己能力嘅事項。正所謂長江後浪推前浪，要上位同保住個位都要有能力，否則好快會跌翻落嚟。

3. 學歷
雖然未必係最重要，但就好似入場券係基本條件。起碼你叫做掌握到相關知識或者理論，對工作有一個方向，幫助實際執行工作。加上香港係知識型社會，先睇學歷係正常事。依家通街都係大學生，大學畢業後繼續讀上去嘅大有人在，你係老闆會點揀？再者，學識係構成能力嘅重要一環。所以有啲人會話就算冇張大學畢業證書，都要考翻張相關資歷嘅課程。想上位，都要有翻一定嘅學歷㗎。
有齊以上三點，祝大家事業有成，更上一層樓！

文：小C

更多打工仔分享，追蹤 ECjobsonline 專頁 或 瀏覽 www.ECjobsonline.com