英調查：64%打工仔帶病照返工

而家天氣忽冷忽熱，好易令人病，最慘嘅係辦公室通風唔好，一有同事病，細菌就會快速散播，極容易中招。
惡菌纏身，又睏又分神，可惜就算有大條道理請病假，國際醫療保健集團保柏一項調查指，過去一年，有64%英國受訪打工仔稱曾帶病返工，更有27%話唔理醫生嘅勸告，無留喺屋企休息，堅持返工去。

有34%受訪者稱，身體出現疼痛，如關節痛或頸背痛，亦會忍痛照常返工；另有29%受訪打工仔表示，有情緒問題出現，如焦慮、抑鬱等，仍會繼續返工。

無論身體有幾唔舒服，好多香港打工仔也一樣唔敢請假，原因大抵跟調查結果差唔多。有20%受訪者稱，死頂帶病返工，只因有太多工作要處理。

另一方面，有26%表示，因怕成為其他同事嘅負擔，病得好嚴重都唔會請病假；16%稱怕同事覺得佢哋「扮嘢」，並非想像中病得咁嚴重。可見唔少人帶病死頂開工，可能係怕得罪同事。
此外，有13%就話因怕公司唔鍾意，請病假會影響份工。專家表示，打工仔患病無得休息，堅持返工嘅做法，擔心咁會令佢哋健康情況變差，同時拖慢工作效率，造成惡性循環。

其實，生病要請假休息係基本人道，謹記身體係自己嘅，病向淺中醫，愈早得到適當診治及休息，先可以早日康復，唔會病到唔斷尾。


更多打工仔分享，追蹤 ECjobsonline 專頁 或 瀏覽 www.ecjobsonline.com