​如何巧妙地叫老闆加人工？

喺公司做咗咁多年，點解老細仲唔加我人工嘅？唔通係我做得唔夠好，老闆唔諗住加我份糧？其實又唔洗諗得咁負面嘅，話曬老細貴人事忙，可能未有時間review大家嘅薪水啫！佢唔記得，大家稍為間接地提醒吓佢，都好應該啊！但係有咩婉轉啲嘅講法，可以請到老闆加人工之餘，聽起上嚟又客氣啲架呢？
1. 用其他公司的薪水作比較
老闆遲遲都唔加大家人工，咁大家就要積極啲，周圍探聽吓同行薪金去到幾多，或者上求職網睇吓自己份工可以有幾高offer，如果發現自己被公司underpaid，應該厚臉皮啲、主動啲，懶係不經意咁同老細講，近排邊間firm乜乜職位人工去到幾多、邊一行需求高咗等等，用實質數據嚟大你老細，今次佢實走唔甩喇掛？不過，記得千祈唔好大大聲話：A公司人工都有幾多幾多啦！老細只會回你一句：咁你又唔走？到時你就反過來被KO掉了。

2. 表示自己曾考慮轉工
同老闆閒談之間，不妨試吓有意無意咁透露自己有諗過轉工，或是想進修、去working holiday等等，總之就好似平時傾偈咁表示自己有諗過唔做，如果你老細係緊張你的話，馬上就會採取行動、加你人工留住你，不過這點都要睇你在公司有幾重要、有幾大貢獻，如果你只係一個small potato，平時做嘢又唔係好上心的話，你老闆可能根本就唔會在乎你的去留。
3. 偶爾埋怨一下百物騰貴
同樣，閒談的時候，偶爾同老闆呻吓依家啲嘢有幾貴，生活有幾艱苦，搵食有幾艱難，老細都係聰明人，一定聽得明你言下之意，有少少人性的話，通常都會加大家人工，等各位有三餐飽飯食吓嘅，不過如果係冷血型老細的話，大家就好自為之喇！

4. 總括自己的工作表現
有時老闆唔加自己人工，唔一定係你做得唔好，可能只係對你嘅印象唔夠深，所以，你就更應該要老闆記得你，尤其係你嘅豐功偉績，不過又唔好太直接咁講自己做過啲乜，咁樣好似同老細講數咁，而係要好似大事回顧咁，話自己今年最開心嘅係完成咗邊個大project、與同事一齊合作搞掂邊份proposal、辛辛苦苦做好咗邊個present等等，總結返自己的工作表現之外，仲可以令老闆記返起你做過啲乜，老細見你咁落力工作，咁幫得公司手，唔加你人工都難啦！
5. 請問老闆加人工的標準和要求
想加人工，就梗係要知道加人工有咩標準和要求啦！唔洗驚，直接問老細係絕對冇問題嘅！點講你都唔係叫緊佢加你人工，只係問點樣先可以加人工咋嘛！咁問一嚟可以知道要老闆加人工，需要具備什麼條件；二嚟可以讓老闆重新審視加薪這個動作，是否有需要加員工人工；三嚟可以令老細覺得你係一個積極向上、有目標、有野心的員工，一舉三得！

6. 直接問老闆
有時候，老細反而唔鍾意啲員工講嘢兜圈、扭扭捏捏，所以，如果你老細係一個講嘢直接、唔鍾意聽廢話的人，不妨直接問老闆，其實自己都做咗一段時間，係咪有需要review吓份糧。其實好多老闆都好願意同員工溝通，大家有商有量，好過你試探我，我又要迴避你咁辛苦啊！而且，話唔定老細只係忙得制一時冇咗件事，有你提點一吓，反而係好事嚟！
打工仔日日咁辛苦做嘢，無非都係為咗生計。如果真係覺得自己值得更多、更好，就應該勇敢向老闆提出，冇理由每日做到成隻狗咁，都唔為自己爭取返啲報酬架嘛！

文：Noelle

更多打工仔分享，追蹤 ECjobsonline 專頁 或 瀏覽 www.ECjobsonline.com