辦公室高度危險人物逐類數 精選

各單位注意！各單位注意！由於辦公室內有高度危險人物，請各位同事對以下人士加以防範：
1. 笑臉迎人 內裡陰沉
啱啱識呢類人嗰陣，一定會覺得佢好nice。成日笑住同你講嘢，有咩問題佢都第一時間出現，仲會不斷鼓勵你……但係呢啲只係假象！實情佢哋係披著羊皮的狼，用假面具換取你嘅信任，到時候就可以利用你去幫佢達到目的。「平時對你咁好，唔幫返佢唔係咁好。」、「平時咁好人，可能真係逼不得已先會咁做。」呢啲想法令你唔入陷阱，成為呢類危險人物嘅棋子，甚至係代罪羔羊！

2. 大聲苦呻 扮曬著緊
呢類人通常係想搏上位。佢哋最鍾意係大聲同人講自己做咗幾多，OT咗幾耐。佢哋話為公司好，自己蝕底少少都唔緊要喎！老細有個咁既員工仲唔笑到見牙唔見眼咩！但你估得佢一個咁辛苦咩，不過係咪咁有需要日日都同人呻呢？影響到工作環境變到負面。
3. 跣人一鑊 欺善怕惡
唔知放到蕉皮一地都係，到你跣親，已經唔係食住花生等睇戲咁簡單，佢哋直情係會用埋花生殼去掟你。可能前一日同你講過，只要跟住佢嘅提議去做咁就perfect，但都你做好第二日，佢就當住所有人面前係咁批評。如果你做錯任何事，佢唔止會馬上話你，仲會將佢記存喺心內，到再有機會入你時，翻炒你過往嘅事，將你貶到一文不值。但係遇到地位俾佢高少少嘅，佢又唔敢出聲話人。正宗欺善怕惡！

4. 亂嗡廿四 辱人為技
以為自己講嘢好好笑，但內容淨係識侮辱人。成日借人哋嘅外型動作做笑點，之後加鹽加醋，周街同人講。遇到呢啲人真係反幾多次白眼都唔掂，因為佢的完全唔覺自己有問題，唔識點寫「尊重」兩個字。
請各位加以提防以上四類辦公室高度危險人物，免得自己心情、人際關係同前途受影響。

文：小C

更多打工仔分享，追蹤 ECjobsonline 專頁 或 瀏覽 www.ECjobsonline.com