【職業談】GO！成為犬隻訓練員

作為寵物主人就要肩負養育寵物嘅責任，「養」或者比較易上手，但要「育」的話可能考起唔少主人。喺香港，唔少狗主因為時間同能力關係教唔到自己嘅寵物狗，所以就要犬隻訓練員幫手。想成為犬隻訓練員教導狗狗？睇埋下面資料先啦！
要有愛心同耐心
呢份工經常都要對住狗隻，最基本條件當然要鍾意狗！想訓練成功狗狗，每個case要花嘅時間都唔一樣。如果狗狗只有輕微問題而且合作，可以一日就完成訓練；但如果遇到問題狗隻，可能要幾個月、一年，甚至更長時間。除咗要對住狗狗，亦要對狗隻主人。想幫助狗狗解決行為問題，要同主人溝通多啲，教佢哋點樣對待狗隻。真係少啲愛心同耐性都唔得㗎！

課程實戰皆重要
因為犬隻訓練員喺外國發展咗一段時間，熱門留學國家，好似澳洲、加拿大、澳洲等都有有開設相關課程。課程內容涵蓋範圍廣，除咗「行為改變」同「比賽訓練」，仲有理論同專門知識，有興趣又能力許可不妨一讀。而香港並無犬隻訓練員發牌制度，想考牌就要去外國考埋喇。如果想留喺香港讀，多數要去犬隻訓練場邊做邊學，或者上坊間嘅課堂講座。坊間都有唔少課程可以報讀，例如愛護動物協會（SPCA）同聖公會等，價錢由數千元至數萬不等，視乎課程內容及師資而定。
自僱形式波動大
喺香港，多數犬隻訓練員係自僱，所以收入唔太穩定。視乎訓練員的年資同經驗，有啲每堂收費幾百蚊，有啲可以去到幾千蚊！一般而言，初入行頭幾年每月收入有機會去到萬五，之後可以上到二萬甚至三萬蚊！香港間唔中有犬隻訓練比賽，都可以成為另一種學習同獲取收入嘅途徑。

準備好成為犬隻訓練員？Just GO！

文：小C


更多打工仔分享，追蹤 ECjobsonline 專頁 或 瀏覽 www.ecjobsonline.com