人不可一日無工，唔做嘢個人好冇目標寄托，而工作時間佔人生偌大嘅比重，我哋努力工作，本來就係為咗生活得更加好，令到生活質素提升，漸漸地，營營役役工作，當工作滿滿地佔據你嘅生活後，少咗時間同屋企人/朋友相處，忙到冇時間同人建立關係，莫講話維繫一段關係，覆message都唔得閒啦，放假最好就喺屋企瞓返夠本好好休息，行街睇戲食飯，公式化到唔想做，當生活只剩下千篇一律工作，工作就只淪為三餐一宿嘅生存遊戲？最後，工作為咗生存，毫無生活可言，事實係咪絕對？
時間管理
放工返屋企，梳洗食飯睇電視玩電話瞓覺，第朝又瞓醒塞車迫地鐵返工，循環不息，如果你已經麻木地盡責，請分配返一啲時間對你嘅生活盡責，對自己唔好咁求其，每日用幾分鐘同自己約會，問一問個心，了解一下自己嘅狀態，如果內心好似個杯啲水太滿，倒咁啲又可以重新斟過。例如睇電視放空一下自己，雖然係最簡單直接嘅解壓娛樂，不過生活都係同人相處為主，唔係同電器相處，留意一下唔好懶太耐做咗隱蔽青年，抽啲時間出去見山見人啦。
選擇對象
人與人之間嘅感情不進則退，唔傾唔搵交情就會變冷淡，好耐唔搵更加唔會再搵，如果係在乎嘅對象，唔一定要等人哋關心你，不妨主動同家人朋友傾吓計，用幾分鐘細心望下佢個樣，關心一下對方一日落嚟做過啲咩，都唔係用你好多時間，一點一滴都係建立緊你美好生活嘅一部份，無謂失去先嚟可惜為時已晚，交情呢樣嘢，唔交邊有情。
小編明白，你都唔想做三文魚，跟所有人同一個方向遊走，最緊要工作係為生活，攞個平衡，保證你嘅內心一定唔會空虛寂寞凍，雖然說易行難，但工作只為生存，會唔會好痛苦啊？今天，你在生活嗎？
文：金金
更多打工仔分享，追蹤 ECjobsonline 專頁 或 瀏覽 www.ecjobsonline.com
請按此登錄後留言。未成為會員? 立即註冊