根據非正式統計，香港打工仔十個有九個都鐘意去旅行。點解？因為香港工作壓力大，開支又高，想要出走感受下悠閒假日氣息，過返「正常」生活。考量過時間、洗費、旅行地特色等因素後，為大家介紹以下5個旅遊地方，等大家可以近近地玩返轉！
1. 語言必通慢活遊：台中
「飛台灣仲快過由柴灣去荃灣」呢句成日都聽到。如果想感受慢活現代小城市同自然，可以去下台中。到臺中國家歌劇院享受由日本建築師設計並獲獎嘅現代式建築；國家去彩虹眷村欣賞當日為反對拆富有歷史意義嘅村落而畫嘅壁畫；日落前去高美溼地觀賞全台最美夕……喺呢個台灣國民飲品珍珠奶茶發源地唔單止有傳統茶店春水堂，甚至引起港台熱話嘅新興手搖飲品店：老虎堂、蜜滋麻美、珍煮丹等，都係台中起家。想飲住珍珠奶茶體驗慢活式快樂，一於選擇台中。
喺去台灣唔係唔飲珍珠奶茶呀？
2. 歷史文藝泰自在：清邁
曾經係泰國皇朝首都，清邁保留濃厚泰國歷史文化。參觀十四世紀建成嘅柴迪隆寺呢座泰北最大寺廟；到訪白廟呢座由泰國現代知名建築師設計嘅新興全白色寺廟；到老清邁文化中心了解當地歷史同欣賞傳統表演……除咗歷史氣息，被泰國政府定位為文藝城市嘅清邁仲有唔少特色手作工藝品。去下創意市集Fin Market，或者可以搵到啱自己心水又獨一無二嘅紀念品，為清邁假期留下美好回憶。
3. 古城海港越鍾愛：會安及峴港
鍾意東南亞歷史古蹟同海港？千祈唔好錯過越南中部城市會安同峴港。會安古鎮已經被列為世界遺產，入面嘅建築充滿越、中、日三地古樸文化，而且每間小屋幾乎都有顏色鮮艷嘅攀藤植物作點綴，非常有味道，行足一日都未必夠喉。城內仲有米芝蓮大推，堪稱有最好食嘅法包嘅Banh Mi Phung！跟住坐一個幾鐘車去到另一個風貌嘅城市峴港，尋找陽光與海灘、品嚐地踎咖啡室Long Coffee嘅滴漏咖啡、到Con Market搵出地道越南菜。
入夜後會安古鎮另有一番風味！
4. 戀戀日式自然：沖繩
雖然係日本一部份，但沖繩仍然保留獨有嘅琉球文化。呢個日本最大外島天氣一年四季幾乎好似夏天咁—碧海、藍天、綠地……想親親大海洋仲可以去石垣島同宮古島浮潛；唔識游水唔緊要，去萬座毛惡補地理知識—即係欣賞因天然風化侵蝕而形成嘅象鼻岩石；要探索琉球文化，去琉球村參與琉球文化體驗，好似藍染咁。
5. 韓版藍天夏威夷：濟州
濟州向來係韓國人自己嘅渡假勝地，皆因呢個火山島有多面自然風光。濟州島東南西北四個方位嘅地方都各有不同，不過介紹下。想同清澈無比嘅大海，一定要去近東北面嘅金寧海水浴場或者月汀里海水浴場，前者面積雖然唔大，但就冇咁多人去；後者吸引好多韓國遊客，仲可以去海灘前嘆住咖啡睇靚海。鍾意踩單車同行山呢類戶外活動，可以搭船去牛島，花一整日過海外桃園生活。濟州仲有唔少橘場同牧場開放等大家參觀或者進行體驗，好似迷你馬體驗公園呢個位於西歸浦市嘅體驗牧場，你可以參加製餅、騎馬等體驗，不過要留意洗唔洗預約啊！當地特色美食除咗黑毛豬同橘類製品，大家都可以試下A LA PA PA咖啡麵包店嘅麵包甜品，仲可以買自家製果醬做手信㖭！
喺月汀里海水浴場隨心咁入一間cafe，望住大海度過悠閒下午
諗好下次旅行去邊未呢？快啲告假實行呢個短期渡假大計，等自己叉下電啦！
文：小C
更多打工仔分享，追蹤 ECjobsonline 專頁 或 瀏覽 www.ecjobsonline.com
請按此登錄後留言。未成為會員? 立即註冊