【失眠救星】成日失眠？7種植物幫助入睡

都市人多病多痛，日坐office 9個鐘，搞到個人腰痠背痛不在話下，壓力大、多煩惱，導致失眠更加係好多人每晚都必須經歷嘅痛苦，明明攰到死就偏偏瞓唔着，食安眠藥又唔健康，長期咁落去真係唔係辦法！其實要解決失眠，唔一定要食藥嘅，放幾棵植物喺間房度，都可以有助入睡架！
1. 茉莉
茉莉花有減少焦慮、改善心情和睡眠質素嘅功效，加上茉莉氣味芳香，比其他盆栽植物易種，仲好適合喺通風、半陰嘅環境下生長，啱曬喺睡房裡面種返棵。

2. 薰衣草
唔少香薰、精油都會用薰衣草嚟提煉，咁係因為薰衣草嘅香味含鎮靜、安神嘅作用，可以舒緩人嘅心情，更有助治療失眠和焦慮症狀。想隨時隨地有好心情、有覺好瞓嘅話，大家仲可以試吓用薰衣草嚟煮餸、做番梘、泡茶、洗衫、洗頭，整乾咗再密封用嚟做香包或者香罐，放喺門口或衣櫃內，更能除臭、防蟲，一物多用。
3. 薄荷
除咗薄荷，喺坊間都會搵到好多薄荷味嘅精油，皆因薄荷同樣有放鬆心情和幫助睡眠嘅功用，仲能夠抗臭氧和殺菌，但記住份量要適可而止，大量食用薄荷反會弄巧反拙、導致失眠架！

4. 蘆薈
蘆薈有別於一般植物，其於晚間會釋放氧氣，提高人嘅睡眠質素，連NASA都列佢為改善室內空氣品質嘅植物之一，加上蘆薈易種，唔需要淋太多水，唔洗陽光照射，都可以生長得好好，真係養得過！

5. 忘憂草
同個名一樣，忘憂草嘅葉具安神作用，有助治療神經衰弱、心煩不眠、體虛浮腫等症狀；而忘憂草嘅花，就有健胃、補血等功效；根部則能利尿、消腫。最重要嘅係，忘憂草有抗衰老嘅功效，真係要養返棵先得！
6. 艾草
唔少人做嘢做得辛苦得制，都會用艾草嚟浸吓腳，舒緩吓神經；其實除咗做嘢辛苦，失眠嗰陣，攞熱水同新鮮艾草嚟浸腳，都有唔錯嘅效果架！皆因艾草有一股好特別嘅馨香味，其有安眠解乏嘅功效，仲可以驅蚊、殺菌，放少少艾草喺枕頭邊，一定晚晚都有好覺瞓！

7. 迷迭香
迷迭香，即係rosemary，平時我哋都係用佢嚟整西餐多，但原來佢仲有鎮靜安神、醒腦、利尿、治療失眠、心悸和頭痛嘅作用，對付消化不良和胃痛更有一手，用佢嚟沖水飲，包你有覺好瞓！

想改善失眠症狀？唔一定要靠食藥嘅！自然界就有好多天然良藥任君選擇！有啲唔單止聞得、睇得，仲用得、搽得同食得，以後就唔洗再怕失眠啦！
文：Noelle

更多打工仔分享，追蹤 ECjobsonline 專頁 或 瀏覽 www.ecjobsonline.com