易煩躁?EQ太低?如何將心理鍛鍊得更強大

人愈大,應該愈成熟至係,但唔知點解依家小小嘢都會搞到個人好忟、好唔開心,遇到些少挫折,有時會反問自己係咪EQ(情商)太低呢?其實又唔一定嘅,可能只係心理上未有足夠嘅勇氣去面對挫敗同其他人嘅批評啫!鍛鍊吓咪得囉!

1. 情緒管理
好多人一唔開心就會情緒爆煲,咁樣係心理較脆弱嘅表現。要鍛鍊強大嘅心理,控制好情緒自然就係首要任務。了解每一個容易令你抓狂、崩潰嘅情況,學習點樣控制呢啲負面性發洩,並將佢轉化成動力,唔好畀壞情緒控制返你轉頭。

2. 每日反思自己
失敗後受到批評,好多時都係因為自己做得未夠好,不過大家都識講,今次做得唔好,咪下次做返好佢囉!冇咩大不了!所以,面對失敗,第一件事唔係喊,而係要知道自己有咩需要改善。每日花少少時間反省自己,今日有咩地方係有進步空間?有咩係自己做得唔夠好?有咩錯誤要注意以後唔好再犯?每日抽一些時間作自我反思,相信你一定可以一天比一天進步,成為更好嘅人!

3. 搵出自己嘅強、弱點
畀人鬧、遇上挫折,我哋通常都淨係識諗埋一邊,唔識得樂觀啲去安慰自己。其實finance嗰part做得唔好,可能係因為你數口唔叻啫!但你英文好,份計劃書勝在寫得夠detail啊嘛!又例如你冇咩marketing skill,但你啲idea夠創新啊嘛!只要儲多啲經驗、持續學習,一定可以學到更多嘢嘅!因此,凡事唔好諗得咁負面,人就梗係有長、短處架啦!只要識得搵返自己嘅優點嚟安慰自己,件事其實都唔係你諗得咁差啫!

4. 設定目標
今日做得未夠好,唔代表聽日都做唔好嘅!面對失敗時,不應只會放大失敗嘅地方,而係應該為自己設定一個目標,例如今日同個客冇咩交流,對方好似冇乜癮咁,你就要set個target畀自己,下次見面一定要social啲、多啲同個客傾偈,提高佢對公司員工嘅好感;又例如今次做present太緊張,講嘢好窒,咁你就要畀個目標自己,下次一定要放鬆啲,講嘢慢啲,等自己有更好嘅表現。畀空間自己進步,每日做得好一啲,個人都開心啲啦!

5. 突破自我界限
經歷過自己一個人,你先會學識點樣獨立自處;同一道理,過度咗「不適應」期、克服咗未來嘅不確定性和恐懼,人先會成長。因此,欲鍛鍊強大嘅心理,不妨嘗試突破自己一直以來嘅框限,踏出你嘅comfort zone,例如一直怕孤單嘅你,為咗鍛鍊自己,選擇勇敢一個人去旅行;又或者係一直好怕周圍social嘅你,嘗試join吓唔同嘅聚餐gathering,話唔定會有意想不到嘅收獲,可能你就係咁唔再怕一個人,甚至變成一個健談、擅於交際嘅人。

有強大嘅心臟,先經得起考驗!睇完以上5點,希望他朝你都能夠成為一個心理強大嘅人,以後有咩困難都可以勇敢迎難而上!

文:Noelle

更多打工仔分享,追蹤 ECjobsonline 專頁 或 瀏覽 www.ecjobsonline.com

留言


請按此登錄後留言。未成為會員? 立即註冊
    快捷鍵:←
    快捷鍵:→