除咗暑期工和part-time，唔少大學生都會想做多幾份intern，攞多啲工作經驗，話唔定做得好，仲會有return offer，唔洗驚畢咗業之後搵唔到工。不過，唔好以為自己係實習生，只係small potato，就公司有咩大、小事都好似唔關自己事咁，淨係識坐喺個位度等人畀嘢你做，其實做實習生都有好多嘢需要注意架！
1. 凡事主動啲
做新人雖然係會驚青啲，但大學生嚟架嘛！機會嚟到，就唔好怕醜喇！冇嘢做嘅時候，就主動啲問吓阿head有冇咩可以幫手？有嘢唔明，都唔洗驚畀人覺得你咩都唔識，唔識就問到識，好過你唔識喺度估估吓，最後做錯曬啲嘢，要啲full-time幫你執手尾！凡事主動啲，人哋反而會欣賞你嘅勤力同積極，分分鐘仲會加你分添啦！
2. 嘗試融入圈子
雖然你唔係full-time，可能你都係做一、兩個月就會走人，但都可以嘗試同啲full-time打好啲關係，例如當啲full-time邀請你一齊食lunch，不妨應約同大家出去傾吓偈，了解多啲公司嘅工作環境、文化和人際，仲可以聽吓佢哋對公司嘅睇法，對你將來投身職場絕對有幫助！多啲與同事打交道，話唔定仲可以識返幾個好朋友添！相反，如果你成日都自己摺埋一二邊，對方反而會覺得你難溝通！
3. 不要參與八卦討論
同啲full-time一齊出去食飯，點都會聽來少少八卦嘢，或是聽佢哋講邊個阿頭嘅壞話，但記得你只係一個實習生，喺對公司內部運作冇幾多認識嘅情況下，勸你都係唔好發表任何意見好啲，畢竟直接畀分你嘅，可能就係嗰位阿頭，畀佢知道你都有份講佢壞話，睇嚟你份intern都唔洗旨意有得pass！因此，當啲同事喺度講八卦嘢嘅時候，你都係聽好喇！千祈唔好加把口埋去！
4. 留下好印象
話曬實習生留喺公司嘅日子都唔長，公司點都唔會畀好多重要嘢你做，最多都係叫你入吓data、影吓印、對吓文件等等，做呢啲嘢真係表現唔到啲咩。所以，你就更加要喺其他方面畀個好印象人：例如唔好遲到早退、每日臨放工前執返整齊自己個位、多啲發問、多啲主動幫手，離職前買埋散水餅請大家食，咁就算你真係冇處理過啲咩大project，大家都會記得你！
5. 自己利益自己爭取
有啲公司會覺得實習生只係嚟學嘢，人工唔會畀得太高，咁諗都尚算合理，但如果你OT完公司都唔補水畀你，甚至乎成日都當你係廉價勞工，點你入新界做嘢又唔claim返車馬費畀你，咁你真係要為自己爭取返喇！Intern都有尊嚴架嘛！最重要嘅係，臨走前記得問公司拎返封reference letter，對遲啲搵工有着數！
返intern冇乜嘢做，日日上網打發時間？可能人哋係測試緊你會唔會主動問有冇嘢需要幫手咋！睇熟以上5點，相信大家一定可以成為最優秀嘅實習生！
文：Noelle
更多打工仔分享，追蹤 ECjobsonline 專頁 或 瀏覽 www.ecjobsonline.com
請按此登錄後留言。未成為會員? 立即註冊